Marapattaý rásimin resmı túrde ashqan QHA Tóraǵasynyń orynbasary Leonıd Prokopenko baıqaýdyń dástúrli túrde Tuńǵysh Prezıdent kúnine oraı uıymdastyrylyp jatqanyn aıta kele, baıqaýǵa qatysqan jýrnalısterge alǵysyn bildirdi.
Qazylar alqasynyń tóraǵasy Parlament Májilisiniń depýtaty Saýytbek Abdrahmanov jýrnalısterdi marapattaý barysynda: «Bizdiń halqymyzdyń birligi – basty baılyǵymyz. Bizdiń basty qazynamyz – jerdiń astynda da, ústinde de emes, adamdardyń júreginde. Nursultan Nazarbaev kóptegen ǵasyr boıy kemshilik dep sanalǵan nárseni, ıaǵnı eldiń kóp ulttylyǵyn eldiń artyqshylyǵyna aınaldyra bildi», dedi.
Baıqaýdaǵy «Qoǵamdyq kelisim men jalpyhalyqtyq birliktiń qazaqstandyq modeline arnalǵan úzdik materıal» atalymy boıynsha birinshi orynǵa «Kazahstanskaıa pravda» gazetiniń Pavlodar oblysyndaǵy tilshisi Ekaterına Beskorsaıa ıe boldy. «Assambleıa qyzmetiniń jańa baǵyttary men jobalary týraly úzdik materıal» atalymy boıynsha «Qazaqstan» ulttyq telearnasynyń Taldyqorǵandaǵy tilshisi Qýanysh Serikqanov birinshi oryn alsa, «О́skeleń urpaqty qazaqstandyq patrıotızm rýhynda tárbıeleýge arnalǵan úzdik materıal» atalymy boıynsha «Dostyq aımaǵy» jýrnalynyń bas redaktory Dmıtrıı Poltarenko birinshi dárejeli dıplommen marapattaldy. «Túrkistan» halyqaralyq gazetiniń tilshisi Dınara Jeldibaeva «Memlekettik tildi nasıhattaýǵa arnalǵan úzdik materıal» atalymy boıynsha birinshi orynǵa ıe boldy. «Áleýmettik jelilerdegi qoǵamdyq kelisim men jalpyhalyqtyq birlik taqyrybyna arnalǵan úzdik materıal» atalymy boıynsha birinshi orynǵa «Davaıte govorıt» baǵdarlamasynyń júrgizýshisi Aıgúl Múkeı laıyq dep tanyldy.
Sondaı-aq «Astana – beıbitshilik pen kelisimniń 20 jyly» degen taqyryptaǵy úzdik materıalǵa taǵaıyndalǵan arnaıy júldeni «Qazaqstan» ulttyq telearnasynyń jýrnalısi Ońǵar Toqanov ıelendi. Áleýmettik jelilerde «Táýelsiz Qazaqstannyń damýyna qosqan meniń úlesim» taqyryby boıynsha baıqaýǵa qatysyp, eń úzdik post jazǵan belsendi paıdalanýshylar baǵaly syılyqtar jáne dıplomdarmen marapattaldy.
Aǵymdaǵy jyldyń maýsymynda «Rýhanı jańǵyrý» baǵdarlamasy aıasynda QHA «Qazaqtaný» mádenı-aǵartýshylyq jobasyn júzege asyrdy. Osy oraıda memlekettik tildiń qoldanylý aıasyn keńeıtý jáne «Qazaqtaný» jobasyna aqparattyq qoldaý bildirgeni úshin QHA taǵaıyndaǵan gran-prı júldesi fılologııa ǵylymdarynyń kandıdaty Kamal Álpeıisovaǵa tabystaldy.
Aıta ketý kerek, qoǵamdyq kelisim men jalpyulttyq birlik salasyndaǵy medıasııa ınstıtýttaryn damytýǵa kómektesý maqsatynda Qoǵamdyq medıatorlar arasyndaǵy uıymdastyrylǵan baıqaýdyń jeńimpazdary anyqtaldy. Batysqazaqstandyq Qurman Bıseǵalıev «Eń úzdik medıator», Pavlodar oblysy ákimdiginiń «Qoǵamdyq kelisim» KMM ortalyǵynyń meńgerýshisi Olga Nıkolashına jetekshilik etetin kabınet «Eń úzdik medıasııa kabıneti» dep tanyldy.
Aqmaral AǴZAMQYZY,
«Egemen Qazaqstan»
Sýretterdi túsirgen Erlan OMAR
