Zertteýler kórsetkendeı, Senek aýyly ákimdigi men soqyrlar qoǵamy arasynda memlekettik satyp alý týraly shart jasalǵan. Onda tapsyrys alýshy Qaraqııa aýdanyndaǵy bir ǵımaratty jóndeý jáne abattandyrý jumystaryna kirisedi. Oryndaý merzimi - 45 kún.
Tapsyrys berýshi ákimdik ókilderiniń aıtýynsha, jóndeý jumystary talapqa saı júrgizilgen, biraq 20 kúnge keshiktirilip, atqarylǵan jumystar týraly akt eń sońynda tapsyrylyp otyr.
- Tehnıkalyq sıpattamalarda kórsetilgen jumystardan basqa, shartta qamtylmaǵan qosymsha tapsyrmalardy óz esebimizden júzege asyrdyq. Merdiger kelisimine qol qoıylǵannan keıin jumys barysynda jobalaý-smetalyq qujattamada qamtylmaǵan jol jıekteriniń tasyn tóseý isi qosylǵan. Onsyz jol salý múmkin emes, ári jıekterdiń sapasy úshin mańyzdy ekeni anyqtaldy. Munan ózge tapsyrys berýshi jergilikti baǵalaýlar boıynsha tósemtas tóseý úshin jol jaǵalaýy kólemi 80 tekshe metr dep belgilegen. Is júzinde 150 tekshe metr jer jóndelgen. Atalǵan jaǵdaılar týraly Senek aýyly ákimge ýaqytyly habarlandy, deıdi kásipker B.Tilepov.
Búginde qazaq soqyrlar qoǵamynyń Aqtaý oqý-óndiristik kásiporny memlekettik satyp alý kelisim-shartyndaǵy jóndeý jáne abattandyrý boıynsha barlyq jumystar tolyqtaı atqarylǵan. Alaıda, aýyl ákimi ózge de qosymsha jumystardy oryndaýdy talap etip, tıisti qujattarǵa qol qoımaǵan. Kásipker el ıgiligi úshin qosymsha tapsyrmany oryndaýǵa qarsy emes. Tek oǵan da qarjy shyǵyndary talap etiletindikten osyǵan deıin oryndalǵan jumystar boıynsha tolyq esep aıyrysýyn suraıdy.
Sonymen qatar, Senek ákimi kásipkerdi oryndaý merzimin buzdy dep memlekettik tapsyrystardy oryndaýǵa josyqsyz qatysýshylar dep taný týraly talap-aryzben mamandandyrylǵan aýdanaralyq ekonomıkalyq sotqa júgingen. Sondaı-aq, talapker sot prosesi bastalmaı turyp, talap qoıý kezeńin saqtamaǵan.
Mańǵystaý oblysy kásipkerler palatasynyń Jańaózen fılıalynda osy másele boıynsha dóńgelek ústel ótti. Oǵan fılıal dırektory Q.Kóshenov, Senek aýylynyń ákimi B.Erkeǵulov, sarapshy Q.Salıhov, Kásipkerler quqyǵyn qorǵaý jáne sybaılas jemqorlyqqa qarsy kúres keńesiniń tóraǵasy Sh.Sultanov, óńirlik kásipkerler palatasy dırektorynyń orynbasary Á. Janaev, Jańaózen prokýrorynyń orynbasary Á.Borashev qatysty.
- Shara sońynda aýyl ákimi aıaqtalǵan jumystardyń aktisin berýge, jumys qunyn tolyq tóleýge ári sotqa joldanǵan aryzdy qaıtaryp alýǵa tıis dep kelisildi. Al, soqyrlar qoǵamy qosymsha jumystardy tolyq oryndaýǵa mindetteldi, deıdi keńes tóraǵasy Sh.Sultanov.
Osylaısha, taraptar arasynda týyndaǵan másele beıbit jolmen sheshildi. Qazaq soqyrlar qoǵamynyń Aqtaý oqý-óndiristik kásipornynyń talaby tolyǵymen qanaǵattandyryldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
