Abzaldyń qasyna ózi sııaqty aǵash sheberlerin jınap, qazaqtyń erteden beri tutynǵan turmystyq buıymdaryn, onyń ishinde ydys-aıaqtar jasaýmen aınalysqanyna birneshe jyl boldy. Áýelgide aǵashtan astaý, tabaq jonýdy ermek sanaıtyn ol kúnderdiń kúni muny kásipke aınaldyrýdy kózdedi. Aldymen aǵashtan ydys-aıaq jonyp, ony tutynýshylar talǵamyna saı etip jasaý úshin arnaıy kýrstan tálim alýdy oılady. Biraq Taldyqorǵanda bul istiń qyr-syryn ashyp oqytatyn maman joq bolyp shyqty. Izdengen muratqa jetpeı me, aǵashtyń tilin biletin adam Taraz qalasynan tabyldy. Abzal erinbeı basqa qalaǵa baryp, aǵashtan astaý jasaýdyń syryn úırenip, ádisin alyp qaıtty.
Biraq bastaǵan is birden bızneske aınalyp kete qoımady. Arnaıy qurylǵylar men oryn qajet boldy. Shıkizat kózi taǵy bar. Ári qol ushyn beretin kómekshi de kerek. Al muny uıymdastyrý, qural-jabdyq satyp alý men seh ashatyn oryn jaldaý úshin qarjy kerek edi. Dál osy tusta «Atameken» ulttyq kásipkerler palatasynyń «Bastaý» jobasy dúnıege kelip jatqan bolatyn. Izdegenge-suraǵan bolyp, Abzal endi kásipkerliktiń álippesin oqýǵa bet burdy. Nátıjesinde, «Bıznestiń jol kartasy - 2020» baǵdarlamasy aıasyndaǵy memlekettik grant baıqaýyna qatysýǵa bel býdy. Abzal Begimbetov usynǵan «Aǵashtan ulttyq ydystar jasaý óndirisi» jobasy úzdik atanyp, 1 mıllıon teńge kólemindegi grant buıyrdy. Kásipker bul qarajatqa qural-jabdyq satyp alyp, sehtyń aýmaǵyn keńeıtti.
Qazir «Tabystyń» óndiris sehynda bes adam jumys isteıdi. Olar kúnine 12-15 danadan astaý daıyndaıdy eken.
– Aǵashtan shabylǵan ydysty tutynýshylar qatary jyl sanap kóbeıip keledi. Ásirese et tartýǵa arnalǵan aǵash astaý ótimdi. Bizdiń ónimderimizge Astana, Almaty, Qostanaı qalalarynan arnaıy tapsyrys berip, aldyrýshylar bar. Qazir astaýlarǵa qazaqtyń oıý-órneginiń ishinen «úkikóz» atty nusqasyn tańdap, jasatýshylar kóp. Bizdi taýarǵa tapsyrys berýshi adamdardyń ulttyq sıpatqa da mańyz bere bastaǵany qýantady, – deıdi aǵash sheberi Abzal.
Qalmahanbet MUQAMETQALI,
«Egemen Qazaqstan»
Almaty oblysy
