Mundaıda qazaq «aqsarbas!» deıdi. Biz de sóıttik. «Muzbalaqtan» keıin-aq sapaly túsirilgen otandyq anımasııaǵa jaqsy maǵynasynda dánigip alǵan kóńil «Kúlteginniń» kórsetiliminen de úlken úmit kútken. Senim aldamapty. Basty olja – osy.
Kúlli túrki álemine ortaq dańqty qolbasshy – Kúlteginniń erligi jaıly baıandalatyn kórkem týyndy premerasynyń Elbasy Nursultan Nazarbaevtyń «Uly dalanyń jeti qyry» atty baǵdarlamalyq maqalasynyń jaryqqa shyǵýymen tuspa-tus kelýiniń ózi de – otandyq kınematografııamyzdaǵy ulttyq ıdeologııa máseleleriniń oń baǵytta júrgizilip kele jatqandyǵynyń aıqyn aıǵaǵy bolsa kerek.
Mádenıet jáne sport mınıstrliginiń tapsyrysy boıynsha jas rejısser-anımator Adaı Ábildanyń qolynan shyqqan atalmysh tarıhı anımasııalyq týyndy kóshpendi halyqtardyń basyn biriktirip, Uly dala dástúrin jalǵastyrǵan túrik qaǵanatynyń dańqty áskerı qolbasshysy Kúlteginniń jastyq shaǵy men qaharmandyq erliginen syr shertedi. Fılm óziniń sıýjet shytyrmandyǵy, oqıǵa dınamıkasy hám ssenarıı sonylyǵymen erekshelenedi.
– «Kúltegin» fılmi shyǵarmashylyq ujym úshin úlken tájirıbe boldy. Túsire júrip úırendik, bildik, damydyq. Atalmysh týyndyny jaryqqa shyǵarýǵa elimizdiń jıyrmadan asa úzdik kompıýterlik grafıka jáne anımasııa mamandary atsalysty. Fılm nebári bir jyldyń ishinde túsirilip, óńdelip, endi mine, kórermenimen qaýyshyp otyr. Bul – halyqaralyq standarttar boıynsha óte az ýaqyt. Alaıda bar kúshimiz ben janymyzdy salyp jasap shyǵarǵan týyndymyz kishkentaı kórermenderimizben qatar, barsha ónersúıer qaýymnyń da kóńilinen shyǵady dep senemiz, – dedi fılm rejısseri Adaı Ábilda.
Buǵan deıin shyǵarmashylyq qarymyn «Qońyraý» (2009 j.), «Mıko» (2009 j.), «Ańshy» (2010 j.), «Kókbalaq» (2011 j.), «Jeruıyq» (2013 j.), «Kilem ústindegi qala» (2014 j.) syndy birneshe qysqametrli fılmde synap kórgenimen, «Kúltegin» – rejısser Adaı Ábildanyń tolyqmetrli anımasııalyq fılmdegi debıýti. Alǵashqy tájirıbeniń árıne jaýapkershiligi de joǵary bolady. Sony sezingendikten de bolar, kún demeı, kún demeı izdengen rejısser eńbegi óz jemisin berip, qazaq kınematografııasynyń qorjyny jáne bir maǵynaly da mazmundy tyń týyndymen tolyǵyp otyr. Atalmysh fılm 22 qarashadan bastap jalpyhalyqtyq prokatqa shyqty.
Nazerke JUMABAI,
«Egemen Qazaqstan»
