19 qarashada Londonda Ulybrıtanııadaǵy Qazaqstan mádenıeti kúnderi aıasynda Dımash Qudaıbergenniń jeke konserti ótti. Bul shara Qazaqstan Respýblıkasynyń Mádenıet jáne sport mınıstrligimen uıymdastyrylyp, Ulybrıtanııa men Soltústik Irlandııa Birikken Koroldigindegi Qazaqstan Respýblıkasy Elshiliginiń qoldaýymen boldy.
«Indigo at the O2» konsert zalyndaǵy trıýmfynan soń, Dımash Qudaıbergen halyqaralyq jetekshi BAQ ókilderimen kezdesý úshin, Londonda taǵy 2 kún boldy. Dımash ár suhbatynda Qazaqstan týraly, ulttyq salt-dástúrler týraly qazaq tilinde aıtyp berdi. Ánshiniń aıtýynsha, ol álemge týǵan eliniń mádenıetin ana tilinde jetkizetinin maqtan tutady. Dımash Qudaıbergen Londonda ótken óziniń alǵashqy jeke konsertin uıymdastyrýshy – QR Mádenıet jáne sport mınıstrligine alǵys bildirdi.
Sondaı-aq, osy kúnderi ánshi Ulybrıtanııa men Soltústik Irlandııa Birikken Koroldigindegi Qazaqstan Respýblıkasynyń Tótenshe jáne О́kiletti elshisi Erlan Ydyrysovpen kezdesti. Elshi myrza Dımashtyń búkil álemde Qazaqstan elshisi ekenin jáne elimizdiń bedelin álemdik deńgeıde kóterip júrgenin atap aıtty.
Sol kúni ánshi Londondaǵy qazaqstandyq stýdenttermen kezdesti. Kezdesý Ulybrıtanııa men Soltústik Irlandııa Birikken Koroldigindegi Qazaqstan Respýblıkasy elshiliginde ótti. Mýzykantpen kezdesýge san alýan salanyń bolashaq mamandary keldi. Olar tosyn fotosessııa ótkizip, ózderin qyzyqtyryp júrgen suraqtaryn qoıdy.
Elshiliktiń dálizinde Dımash jınalǵandarǵa arnap, fortepıanoda birneshe súıikti shyǵarmasyn oryndap berdi.
Álemdik jetekshi redaksııalarǵa arnalǵan suhbat serııasyn Dımash Qudaıbergen BBC televızııasy men radıosyn aralaýdan bastady. Brıtandyq VVS jalpy ulttyq qoǵamdyq teleradıo taratylymy uıymynyń stýdııasynda Dımash qazaq tilinde biregeı suhbat berip, óz shyǵarmashylyǵymen bólisti. «BBC World Service» radıostansııasynda mýzykant «Cultural Frontline» senbilik shoýy úshin óziniń tabys jolyndaǵy tarıhymen bólisti. Baǵdarlama júrgizýshisi Tına Dahelı ánshimen onyń mýzykalyq joly týraly áńgimelesti. Radıostansııanyń jahandyq aptalyq aýdıtorııasy 75 mıllıon tyńdarmannan turady.
Brıtandyq «The Independent» ınternet-baspasyna bergen suhbatynda qazaqstandyq óz mýzykasy men shyǵarmashylyq joly týraly áńgime qurdy. Suhbat radıoǵa arnalǵan podkast túrinde ótti. Tilshini qazaqstandyq ánshiniń qaı jerde demalǵandy unatatyny qyzyqtyryp, osyǵan qatysty suraq qoıdy. Dımash jumys barysymen barǵan memleketterimen bólisip, shetelde eshqashan demalmaǵanyn aıtty.
«Qazaqstanda Aqtóbe degen shaǵyn qala bar. Sol jerde meniń otbasym, ata-ájem, búkil týysym turady. Sol jerde men keremet demalamyn», - dep ánshi ashyq aıtty.
Odan bólek, jas ánshi Londondyq «Candid» jýrnalynyń tilshisi Adam Zorganımen kezdesti. Adam «indigo at the O2» zalynda ótken Dımashtyń konsertinde bolǵanyn jáne qazaqstandyqtyń shyǵarmasyna tánti ekenin aıtty.
«1883» ınteraktıvti mýltımedııalyq platformasyna Dımash óz shyǵarmasy men bolashaqqa qurǵan jospary týraly aıtyp berdi. Portal redaksııasy sándi mýzyka, kıno, saıahat jáne óner álemindegi sońǵy jańalyqtardy taratýmen aınalysady.
Qazaqstandyq ánshi Reseılik TASS jetekshi aqparattyq agenttiginiń tilshilerimen kezdesý ótkizdi. Suhbat barysynda Dımash Igor Krýtoımen birge jasap jatqan jumystary jáne reseılik kompozıtormen bolashaqqa qurǵan shyǵarmashylyq josparlary týraly tolyq aqparat berdi.
Brıtandyq tanymal fotograf Maıkl Donald Dımash Qudaıbergen úshin fotosessııa jasady. Maıkldyń jumystarynyń qatarynda amerıkalyq kınorejısser Martın Skorsezdiń, «The Rolling Stones» rok-tobynyń vokalısti Mık Djaggerdiń, brazılııalyq fýtbolshy Pele men basqa da ataqty adamdardyń fotosýretteri bar.
Sondaı-aq, osy kúnderi ánshi Ulybrıtanııadaǵy «World History Archive» Bas dırektory Aleksandr Goldbergpen kezdesti. Aleksandr Dımash Qudaıbergen týraly avtobıografııa jazýdy josparlap otyr. Kezdesý janǵa jaıly jaǵdaıda ótti, ol Dımashqa qazaq dombyrashysy beınelengen fotosýretti syıǵa tartty. Bul jumystyń ataýy joq. Alaıda, ol 1890 jyly jasalǵany belgili.
Qazaqstandyq teńdessiz ánshiniń shyǵarmasy tilshilerdiń ǵana emes, Ulybrıtanııalyq juldyzdardyń da qyzyǵýshylyǵyn tanytty. Konsert kórermenderi qatarynda jergilikti juldyzdar da boldy. Dımash óner kórsetken kúni ánshige qoldaý kórsetý úshin, Anglııaǵa ataǵy jaıylǵan ánshi Talııa Storm keldi. Ol dostarymen birge Dımashtyń aldaǵy konsertine sáttilik tiledi. Anglııalyq ánshi konsert barysyn óz akkaýntyna jazylǵandarǵa arnap, áleýmettik jelidegi paraqshasynda kórsetti. Konsertten soń olar hat almasyp, aralarynda dostyq baılanys bastaý aldy.
Londondaǵy esten ketpes kúnderden soń, Dımash Qudaıbergen otanyna oraldy.
19 qarashada Londonda Dımash Qudaıbergenniń alǵashqy jeke konserti - «DQ» biregeı shoýy ótkenin esterińizge salamyz. "Indigo at the O2" konsert zaly tolyǵymen toltyryldy, al kórermender álemniń 45 elinen keldi.
