Jastar men stýdentterdiń jáne jalpy jurtshylyqtyń kelýine arnalǵan keńseniń qabyrǵalaryna Elbasynyń «Bolashaqqa baǵdar: rýhanı jańǵyrý» maqalasynda aıtylǵan basty máseleler aıqyndalyp jazylǵan. Sonymen qatar Torǵaı-Arqalyq óńirindegi kıeli jerlerdiń kartasy ilingen. Onyń birazy aımaqtyq jáne respýblıkalyq mańyzy bar tizimderge endi.
Kabınetke Elbasy maqalasynda aıtqan álemdegi ozyq 100 kitaptyń qazaq tiline aýdarylǵan 18 kitaby qoıyldy. Osy «Rýhanı jańǵyrý» jobalyq keńsesiniń ashylý saltanatyna Arqalyq qalasynyń ákimi Eldar Kúzenbaev onyń lentasyn qıdy. Ol jobalyq keńse tek stýdentterdiń ǵan emes, jalpy qala jastarynyń, turǵyndarynyń jıi bas suǵatyn ornyna aınalsa quba-qup ekenin aıtty.
Ashylǵanyna kóp bolmasa da, bilim ordasyndaǵy kóptegen sharalardy osynda ótkizý úshin oqytýshylar men stýdentterden ótinish túsken. О́tkiziletin sharalardyń tizimi men kezek kestesi de jasaldy.
«Rýhanı jańǵyrý» baǵdarlamasyndaǵy aıtylǵan máselelerdiń barlyǵy júzege asý úshin eń aldymen jastar tarapynan yntaly jumystar kerek. Úsh tuǵyrly tildi meńgerý árbir jas úshin tereń rýhanı baılyq ǵana emes, ol erteńgi básekege qabylettiligin qalyptastyrady. Osy keńsede jastar júzege asyratyn talaı tamasha jobalar, ister dúnıege keledi dep senemiz» deıdi ınstıtýt rektorynyń keńesshisi, «Rýhanı jańǵyrý» jobalyq keńsesiniń menedjeri Sabyrjan Tasmaǵambetov.
Jaqynda ınstıtýtta «Úsh tuǵyrly til – básekege qabilettiliktiń negizi» atty ǵylymı-praktıkalyq konferensııa ótti. Onda Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy búgingi urpaqtyń básekege qabiletti bolý úshin kóp tildi bilýi, ulttyq kodty saqtaý, týǵan jerge degen patrıottyq sezimdi tárbıeleý sekildi kóptegen ózekti máseleler qaraldy. Instıtýt rektory Seıitbek Qýanyshbaev eldiń erteńi senip tapsyrylatyn búgingi jastarǵa óziniń dúnıetanymyn qaıta qurý kerektigin, óz halqymyzdyń rýhanı qundylyqtaryn joǵaltpaý, aǵa urpaq ókilderiniń tájirıbesinen úlgi alý kerektigin aıtty. Konferensııada oblystyq «Rýhanı jańǵyrý» jobalyq ofısiniń menedjeri, «Jaıdarly jastar» qoǵamdyq qorynyń dırektory Marǵulan Bákir, O.Baıqońyrov atyndaǵy Jezqazǵan ýnıversıtetiniń dosenti, pedagogıka ǵylymdarynyń kandıdaty Zámzágúl Qashqynbaeva adamgershilik qundylyqtardy damytýda «Rýhanı jańǵyrý» baǵdarlamasynyń roli, tildiń, ádebıettiń ulttyq kodty saqtaýdaǵy mańyzy taqyryptarynda mańyzdy áńgime aıtty.
Konferensııa qonaqtary «Rýhanı jańǵyrý» jobalyq keńsesine úlken baǵa berdi.
Názıra Járimbet,
«Egemen Qazaqstan»
Arqalyq
