«Elbasy Nursultan Nazarbaevtyń bes áleýmettik bastamasy aıasynda Fedorov selosyn gazben qamtamasyz etip otyrmyz. Osydan eki jyl buryn úlken magıstraldy gaz qubyrynyń qurylysy aıaqtalǵan bolatyn. Rýdnyı qalasynan bastalǵan 68 shaqyrymdyq qubyr Qashar kenti arqyly Fedorov aýdanyna jetkizildi. Endi ótken jyly Fedorov selosynyń ishine qubyrlar júrgizile bastady. Munyń barlyǵy Prezıdentimizdiń qamqorlyǵy arqasynda múmkin bolyp otyr. Gaz adamdar turmysyn jaqsartady, qýanyshtaryńyz qutty bolsyn! Kele jatqan Tuńǵysh Prezıdent kúnimen quttyqtaımyn!» dedi Arhımed Begejanuly.
Fedorov selosynda kelesi jyldyń mamyr aıynda gaz qubyry qurylysynyń ekinshi kezegi, al kúzge qaraı úshinshi kezegi tolyq aıaqtalatyn bolady.
«Gaz qubyry kelgennen-aq qýanyshymyzda shek joq. Ári taza, ári jyly, ári arzan. Kómir jaǵýdyń beınetinen arylatyn boldyq. Prezıdentimizge de, oblys, aýdan basshylaryna, gazshylarǵa úlken rahmet» deıdi Fedorov selosynyń turǵyny Rysaldy Esmuhambetova.
Seloda 3000 abonent, 12 myń adam kógildir otynnyń ıgiligin kóredi.
Názıra JÁRIMBET,
«Egemen Qazaqstan»
Qostanaı
