QATER ÁLI SEIILGEN JOQ

Gazettiń keshegi nómirine sýyt joldaǵan maqalamyzda Jetisý jerine jaýǵan mol jańbyr tońy jibimegen jerge sińbeýinen sel qaýpin týǵyz­ǵa­nyn jazǵan edik. Qater áli seıilgen joq. Alty myńnan as­tam adam sel qaýpinen tys jerlerge kóshirilgeniniń ózi apattyń aýmaǵyn ańǵarta alady. Keshe oblys ákimi S.Úm­be­tov Ile aýdanyndaǵy Aqshı selosyna kelip, jurtshylyqpen jınalys ótkizdi. Tosyn tabı­ǵattyń aıaq astynan týyndatqan qaterine oraı kezekti eńbek dem­alysyn úzip, qıyndyqta qalǵan eldiń arasyna tez jetken Serik Ábikenuly halyqqa at­qa­rylyp jatqan jumys jaıynda júıeli áńgimelep berdi. Sel qaýpi tóngen jerlerdegi turǵyn­dar aǵaıyndaryna, kórshiles eldi mekenderge, sondaı-aq aýdandyq aýrýhanaǵa ornalas­tyrylǵan. Taıaý arada shatyrly qalashyq ornatylady. Azyq-túlik jedel jetkizilip jatyr. Ile aýdanyndaǵy geologııalyq-bar­laý pýnktiniń ǵımaraty qal­pyna keltirildi. Bul jerge 300 uıyqtaıtyn qapshyq, 300 jı­nalmaly tósek jetkizildi, 38 ton­na benzın men 39 tonna dızel otyny berildi.   Bógettiń bas jaǵynan sýdy shaqtap tó­menge jiberý uıymdastyrylýda. Oblystyń Jambyl, Eskeldi aýdandarynda, Qapshaǵaı qala­synyń mańaıynda da osyndaı sý qateri bar. Jambyl aýdanyn­da erigen qar sýy Tarǵap bóge­tine qaraı jóńkile aǵyp, bógetti buzyp ketetindeı qaýip tóndi. Soǵan baılanysty Tarǵaptyń tómengi jaǵynda turatyn 200-deı adamdy kóshirý jóninde she­shim qabyldandy. Munda sý al­ǵan 50 úıdiń 3-ine zaqym kelgen, bir úı apatty jaǵdaıda tur. Almaty –  Bishkek tasjo­ly­nyń bir ýchaskesin de sý ba­syp qaldy. Qapshaǵaı – Bal­qash – Qaroı aınalmaly jo­lyn­daǵy jaǵdaı da osyndaı.  Tó­tenshe jaǵdaıdyń saldarla­ryn joıýǵa qolda bar kúsh to­lyq jumyldyrylýda. Panfılov, Uıǵyr aýdan­dary­nan jetken habar boıyn­sha, ondaǵy sýdyń deńgeıi bir­sha­ma qalypqa túsken, qaýip azaı­ǵan kórinedi. Kúmisjan BAIJAN, Almaty oblysy.