Qareketsiz qarap júrý kimge bolsyn jaraspaıdy. Mundaıda burynǵylardyń «qolyń qımyldasa, aýzyń da qımyldaıdy» deıtuǵyn támsilin esten shyǵarmaǵan durys. Memleket jumyssyz júrgenderdiń bar jaıyn oılastyrýda. Máselen, josparda kásibı oqytý jáne nesıe berý máselelerine aıryqsha kóńil aýdarylyp otyr.
– Oblysta barlyǵy 22 myńnan astam adam qamtylyp otyr,–deıdi oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Dına Ahmetjanova,–máselen «Bıznes-bastaý» negizderi boıynsha bilim alǵan 422 adam júz aılyq eseptik kórsetkish kóleminde memleket tarapynan qarastyrylǵan qaıtarymsyz nesıege qol jetkizdi.
Sońǵy jyldary buǵan deıin jumyssyz júrgen adamdardy jumysqa ornalastyrý barysynda aıtarlyqtaı jetistik bar. Oortaq iske elektrondy eńbek bırjasy da at salysýda. Bırja bazasy memlekettik jáne jekemenshik jumys oryndarynyń tolyq aqparatyn, jumys berýshilerdiń anyqtamalaryn jáne bos turǵan jumys oryndarynyń basyn biriktirip, bir arnada toǵytyp otyrǵan septigi mol elektrondyq alań. Qazir burynǵydaı tabanyńnan taýsylyp, jigeriń qum bolyp izdep júrmeısiń. Yntań bolsa, bos turǵan jumys oryndary qolmen qoıǵandaı kórsetilip tur. Aıtpaqshy, jyl basynan beri elektrondy eńbek bırjasy arqyly 14 myńnan astam adamnyń jumysqa ornalasqandyǵyn aıtsaq, tıimdiligi taıǵa tańba basqandaı kórinedi emes pe.
Baǵdarlamanyń birinshi baǵytyn júzege asyrýǵa bir mıllıardqa jýyq qarajat qarastyrylyp otyr. О́z isin bastaımyn degenderge de ońtaıly-aq. Shaǵyn jáne orta bızneske nesıe berý baǵytynda 738 adam qamtylyp otyr. Al, jumyssyz júrgenderdi jańa kásipke beıimdeý úshin kásiptik oqytý boıynsha 1500 adam qamtylyp, bilim alǵan. Bul jumysty 25 kásiptik bilim beretin kolledj atqarýda. Memlekettik baǵdarlamanyń birinshi baǵyty, ıaǵnı, tehnıkalyq jáne kásibı bilim berýmen qamtý boıynsha úsh myńǵa jýyq adam 60 mamandyq jáne 122 biliktilik boıynsha oqytylǵan.
Osyndaı qamqorlyqtyń arqasynda kóptegen adamdar jańa kásibin taýyp, jumysqa ornalasyp jatqanyn kórgende úmit te, senim de eselene túsedi eken.
Baıqal BAIÁDIL,
«Egemen Qazaqstan»
Aqmola oblysy
