- Jartylaı fınalda jeńilgen Nursultan Nurseıitov (64 kg), Dáýren Qamash (88 kg), Gúldana Álmuhanbetova (54 kg), Arýjan Satova (65 kg), Mádına Erjan (80 kg) qola medal ıelendi. Jaýyngerlik samboshylardyń saıysynda Sanjar Nurseıit (79 kg) pen Raıhan Mádı (+98 kg) teńdessiz dep tanyldy. Arýjan Ásemkamalqyzy (72 kg), Serik Shadııar (64 kg), Jalǵas Jumaǵalıev (79 kg), Erasyl Ǵabdýlmanap (+98 kg) fınalda utyldy. Sholpan Altynbek (50 kg), Marjan Bızaq (59 kg), Arýhan Turǵynbaeva (65 kg), Merýert Nurmahanova (65 kg), Ulbosyn Ádilova (80 kg), Nurıla Asanqyzy (+80 kg) úzdik úshtikti túıindedi.
- Sankt-Peterbýrgte aralas jekpe-jekten ASA 202 týrnıri uıymdastyryldy. Jarysta Asyljan Baqytjanuly (17-6-1) kezinde UFC-te kúsh synasqan reseılik Maksım Grıshınmen (34-11-2) kezdesti. Jartylaı aýyr salmaqtaǵy báseke tóreshilerdiń sheshimimen qandasymyzdyń paıdasyna sheshildi.
- Elimizdiń tanymal tennısshisi Zarına Dıas óz mansabyn aıaqtady. Almatynyń týmasy kezinde eki márte Ýımbldonnyń tórtinshi kezeńine jetti. Tórt ret Aýstralııanyń ashyq birinshiligi men bir ret US Open dodasynyń úshinshi aınalymynda oınady. «Rolan Garrosta» da birneshe ret boı kórsetti. Dıas WTA-nyń 1, ITF-tiń 10 týrnırinde top jardy. Osydan on shaqty jyl buryn jerlesimiz álemdik reıtıngide 31-orynǵa kóterilgen edi. Biraq keıinnen jıi-jıi jaraqat alyp, babyn joǵaltty. Burynǵy deńgeıine jete almaıtynyn túsingen Zarına 32 jasynda kortpen qosh aıtysýdy qup kórdi.
- Osyǵan deıin Ystanbul men Rımde ótken Premer-lıgada qarsylas shaq keltirmegen karateshi Sofıa Berýlseva (+68 kg) kúni keshe Qytaıdyń Leshan qalasynda aldyna jan salmaı, altyn medal sanyn úshke jetkizdi. Bul joly ol bes jekpe-jekte jeńiske jetti. Nurqanat Ájiqanov (75 kg) pen Ásel Qanaı (61 kg) kúmis alsa, Oljas Altynbek (67 kg) qolany qanaǵat tutty. Jalpy komandalyq esepte jerlesterimiz tórtinshi satyǵa taban tiredi. Alǵashqy úsh oryndy Túrkııa (2+0+1), Qytaı (2+0+0), Japonııa (1+4+6) oljalady.
- Taekvondodan elimizdiń jastar quramasy Tashkentte ótip jatqan álem birinshiliginiń alǵashqy kúni eki júldege qol jetkizdi. 48 kg salmaqta synǵa túsken Erasyl Erzat pen 55 kg salmaqtaǵy Islam Medetbaı jartylaı fınalda jeńilis taýyp, qola medaldy qanaǵat tutty.
- Fýtzaldan Qazaqstan men Ázerbaıjan quramalary Aqtaý qalasynda joldastyq kezdesý ótkizdi. Bizdiń elge qaıta oralǵan Kakaý úshin bul alǵashqy halyqaralyq match edi. Báseke 9:2 esebimen alań ıeleriniń paıdasyna sheshildi. Qos qurama arasyndaǵy kelesi oıyn 15 sáýirde ótedi.
- Japonııanyń Fýkýoka qalasynda aralas jekpe-jekten uıymdastyrylǵan «Rizin Landmark 13» týrnırinde Nurhan Jumaǵazy (10-1) jergilikti faıter Tene Iosımýramen (5-2) aıqasyp, upaı sanymen utty.
