Festıval uıymdastyrýshysy Almas Jálıdiń aıtýynsha, baıqaý baǵdarlamasy eki seksııadan turady: «The future worth living in» («О́mir súrýge turarlyq bolashaq») taqyrybyna arnalǵan negizgi seksııa jáne úzdik rejıssýra, vızýaldy til, oqıǵa, konsepsııa jáne keıipker nomınasııalary boıynsha ashyq seksııa.
Baıqaýdyń negizgi talaby – fılmniń full AI tehnologııalary arqyly jasalýy. Iаǵnı, jasandy ıntellekt qosymsha qural retinde emes, týyndyny jasaýdyń negizgi ınstrýmenti retinde qoldanylýy tıis. Festıval 2026 jylǵy 28 qyrkúıek pen 1 qazan aralyǵynda Astanada Astana AI Week – jasandy ıntellekt aptalyǵy aıasynda ótedi. Baıqaýǵa jas ereksheligine nemese kásibı tájirıbesine qaramastan kez kelgen adam tegin qatysa alady. Qatysýshylar uzaqtyǵy 10 mınýtqa deıingi qysqametrajdy AI-fılm ázirlep, ony jobanyń sıpattamasymen birge aaiff.ai festıval platformasyna júkteýi qajet.
«О́tinim festıvaldiń resmı saıty arqyly qabyldanady. Jumysty eki jolmen jiberýge bolady: YouTube platformasyna júktep, siltemesin kórsetý nemese Google Drive servısine júktep, siltemesin joldaý. Barlyq ótinimder uıymdastyrýshylardyń biryńǵaı bazasynda tirkeledi jáne júrgiziledi. Sondyqtan avtorlarǵa ótinim mártebesin baqylaýda ustaýdyń qajeti joq», dedi joba avtorlarynyń biri Aızatýlla Hýsseın.
Onyń aıtýynsha, YouTube platformasyna júktelgen vıdeolardyń sıpattamasynda mindetti túrde «Special for Astana AI Film Festival» tirkesi, avtordyń aty-jóni jáne #SpecialForAAIFF heshtegi kórsetilýi tıis.
JI arqyly jasalǵan otandyq fılm Kann kınofestıvalinde kórsetildi
Irikteý qorytyndysy boıynsha AAIFF komandasy men halyqaralyq sarapshylar negizgi seksııadan 10 jáne ashyq seksııadan 15 jumysty tańdap alady. Fınalısterdi kınoındýstrııa, AI-qoǵamdastyq jáne creative tech salasynyń ókilderinen quralǵan halyqaralyq qazylar alqasy baǵalaıdy.
О́tinim qabyldaý 2026 jylǵy 15 tamyzǵa deıin jalǵasady. Baıqaý fınalısteri qyrkúıek aıynda jarııalanyp, kórsetilimder men jeńimpazdardy marapattaý rásimi Astana AI Week aıasynda Astana qalasynda ótedi. Festıvaldiń jalpy júlde qory 1 mln dollar quraıdy.
Eske sala keteıik, buǵan deıin elimizde «Qozy Kórpesh – Baıan Sulý» eposy jelisimen JI-fılm túsirilgen bolatyn.
