Iýnýs Emre men Shákárim Qudaıberdiuly shyǵarmashylyǵy arqyly túrki áleminiń rýhanı murasyn dáripteý maqsatynda uıymdastyrylǵan is-shara túrki oıshyldarynyń eńbekterine arnalǵan kitap kórmesin, eki el mádenıeti men dostyǵyn arqaý etken sýret kórmesin ashýmen bastaldy. L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov pen Ankara áleýmettik ǵylymdar ýnıversıtetiniń rektory, professor, Túrkııa Jazýshylar odaǵynyń tóraǵasy Aryjan Musa Qazym kórmege týyndylary qoıylǵan sýretshilerdi Alǵyshatpen marapattap, sodan keıin eki oqý orny arasyndaǵy yntymaqtastyq týraly memorandýmǵa qol qoıdy. Sondaı-aq Túrkııadan arnaıy kelgen qonaq Ankara áleýmettik ǵylymdar ýnıversıtetiniń rektory Aryjan Musa Qazymǵa «Eýrazııa ulttyq ýnıversıtetiniń qurmetti professory» ataǵy berilip, Abaıdyń qazaq-túrik tilderinde jaryq kórgen «Qara sózderi» tartý etildi. Aryjan Musa Qazym óz kezeginde Iýnýs Emre men Shákárim Qudaıberdiuly shyǵarmashylyǵynyń úndestigine toqtalyp, eki oıshyl fılosofııasynyń túp-tamyry Qoja Ahmet Iаsaýıdiń hıkmetterinen bastalatynyn sóz etti.
Al Parlament Senatynyń depýtaty Nurtóre Júsip Iýnýs Emre men Shákárim Qudaıberdiulynyń shyǵarmashylyǵyna arnalǵan sımpozıým eki el arasyndaǵy rýhanı baılanysty tereńdetýge oń yqpal etetinin, atajurtta otyrǵan qazaq pen bir kezderi Syrdyń boıynan Anadolyǵa qonys aýdarǵan búgingi túrik baýyrlarymyzdyń rýhyn jaqyndastyrý alda da jalǵasa beretinin sóz etti. Munan keıin Iýnýs Emre ınstıtýtynyń professory Tavýkchyogly Orhan Kemal, «Qazaq gazetteri» seriktestigi bas dırektory, ǵalym Dıhan Qamzabekuly baıandama jasady.
Dıhan Qamzabekuly óz baıandamasynda túrki dúnıesiniń qos oıshyly Iýnýs Emre men Shákárim Qudaıberdiuly arasyn alty ǵasyr ýaqyt bólip tursa da, olardyń rýhanı sabaqtastyǵy aıqyn baıqalatynyn áńgimeleı kelip, eki tulǵanyń shyǵarmalarynda da Jaratqannyń qubylysy men qundylyǵyn zerdeleıtin adam zerdesiniń sıpaty men deńgeıi kórinis tapqanyn tilge tıek etti. «Iýnýs Emreniń «Jattaǵanyń jetkizbes, Úńilmeseń áripke» deýinde tereń mán bar. Al Shákárim Qudaıberdiuly muny «Jyǵylmaıtyn dálel tap, Birezý bolma ózimshil» dep jetkizedi. Aqynnyń órnegi de, beınesi de – sóz. Sóz qudireti – poezııa qudireti. Bul týraly eki aqyn da óz dáýirindegi shyndyqqa sáıkes tujyrymdamasyn usynǵan», dedi alashtanýshy.
Túrki halyqtarynyń rýhanı birligin nyǵaıtýǵa, halyqaralyq ǵylymı dıalogti damytýǵa baǵyttalǵan mańyzdy is-shara barysynda Qazaqstan men Túrkııanyń jetekshi ǵalymdary men qoǵam qaıratkerleri oılaryn ortaǵa salyp, eki eldiń rýhanı qarym-qatynasy keleshekte de tereńdep, damı túserin sóz etti.
