Aýyl adamdary osy maldyń súmesimen kún kórip otyr. Kúni erteń ulymdy úılendirip, qyzymdy uzatsam, perzentterimdi qatarynan qaldyrmaı oqytsam osy malym qajetime jaraıdy dep úmittenedi. Al bar kúnkórisi sol mal bolyp otyrǵan el qazynasyn aıdyń-kúnniń amanynda túre qýyp, izim-qaıym joǵaltyp jiberý jaýlyq emeı nemene? Kókshetaý qalasynyń tap irgesindegi Kenesary, Baıanbaı jáne Jamantuz aýyldarynyń támam jurty júgen ustap qaldy. Joǵalǵan jylqymen birge jylqyshynyń da kózden tasa bolýy kóp kúdikke sebep bolyp tur. О́ıtkeni jurt jylqysyn senip tapsyrǵan jylqyshy bir túnniń ishinde belgisiz jaqqa qoparyla kóship ketken. Urlyqtyń izin indetip taratyp aıtatuǵyn bolsaq, qyrýar mal bir kúnniń ishinde joǵalmaǵan. Ańǵal jurt jylqysynyń úıirde joq ekendigin tipti baıqamaı da qalypty. Jylqyshy bir úıir jylqyny aıdap ákelip, tizim boıynsha ıelerine taratyp bergennen keıin malsaq qaýym tabynda 200 bas jylqynyń jetpeıtinin bir-aq bilgen.
– Jylqynyń qoldy bolýyna baılanysty qylmystyq is qozǵaldy, – deıdi oblystyq polısııa departamenti baspasóz qyzmetiniń mamany Ásem Ábdirahmanova, – qazir Býrabaı aýdanynyń birneshe turǵyny kúdikke ilinip otyr.
Bir qyzyǵy, jylqyshynyń jaly da jyǵylǵan joq. Qamaýǵa alý jóninde sanksııa bolmaǵan. Osy arasyn ashynǵan jurt túsinbeı, ańtarylyp otyr. Jaılaǵan jerinen sý shyqqandaı bir túnde kóship ketken jylqyshy kórshi aýylda turatyn kórinedi. Bári belgili bolǵanymen, qashaǵanǵa quryq túspeý sebebi beımálim.
Baıqal BAIÁDIL,
«Egemen Qazaqstan»
Aqmola oblysy
