Foto: Temirbolat TOQMÁMBETOV
Bıyl Bókeı ordasy aýdanynyń 12 aýylyna, jalpy 6550 turǵyny bar 1151 úı men 35 áleýmettik nysanǵa gaz qubyryn tartý úshin Batys Qazaqstan oblystyq bıýdjetinen 213 mln. 511 myń teńge bólingen edi. Aıta keteıik, Oral qalasynan 500-600 shaqyrym qashyqta jatqan Bókeı ordasy aýdanynda 7 aýyldyq okrýg, 22 eldi meken bar. Tabıǵı gaz okrýg ortalyqtary ǵana emes, shaǵyn aýyldarǵa – burynǵy bólimshelerge de tartylyp jatyr.
- Aýdan ortalyǵy Saıhyn selosynan eń shalǵaı jatqan bizdiń Uıaly aýylynda 215 úı bar. Biz bul kúndi asyǵa kúttik. Seksenge jýyq aýyl turǵyny úılerine tabıǵı gaz kirgizýge daıyn otyr. Qazirgi tańda 72 úıdiń qujaty tapsyrylyp, 35 úıdiń qujaty quptaldy. Uıalylyqtar tezek jaǵyp, kúl shyǵarý beınetinen qutylatyn boldy, - deıdi aýyl ákimi Baqytjan Orazǵulov.
Aýdannyń 12 eldimekenine gaz qubyryn tartyp, óńirdiń áleýmettik damýyna úles qosqan merdiger «Álııa-Servıs» JShS bolsa, Uıaly aýylyndaǵy aýylishilik gaz qubyryn «BatysKotloMontaj» JShS júrgizipti. Uıaly aýlyndaǵy jumystardyń jobalyq quny 38,6 mln. teńge bolypty.
– Elbasymyz halyqtyń ál-aýqatyn kóterýdi, turmys sapasyn arttyrýdy basty baǵdar etip otyr. Jyl saıynǵy joldaý, qolǵa alynyp jatqan memlekettik baǵdarlamalardyń qaı-qaısysynyń da basty temirqazyǵy – halyqtyń ál-aýqatyn, ómir súrý sapasyn jaqsartý. Nátıjesin ózderińiz kórip otyrsyz, aýdan taza aýyz sýmen, kógildir otynmen 100 paıyz qamtamasyz otyr. Bıyl 2000 shaqyrym sý qubyry tartylyp, oblys boıynsha 110 eldi mekenge taza aýyz sý jetkizildi. Onyń ishinde tórt aýyl – Bókeı ordasy aýdanynan. Jyl saıyn 500 shaqyrym joldy jóndeý kózdelgen. Oblys boıynsha 44 eldi mekenge gaz tartý josparlanǵan bolsa, búgingi tańda 25 eldi mekende kógildir otyn paıdalanýǵa berildi. Elbasy N.Nazarbaev oblysymyzǵa bıylǵy jyldyń mamyrynda kelgen saparynda jol máselesin kótergen edi. Bul birer aı, tipti birer jylda bite qoıatyn sharýa emes, jaýapkershiligi de, qarajaty da aýqymdy sharýa. Qaztalov-Jánibek-Bókeı orda aralyǵyndaǵy 336 shaqyrym joldy jóndeý qolǵa alyndy. Munyń bári de –Táýelsizdigimizdiń jemisi, Elbasynyń strategııalyq saıasatynyń jetistigi, - dedi Batys Qazaqstan oblysynyń ákimi Altaı Kólginov aýyl turǵyndarymen kezdesýde.
Aýylǵa kelgen kógildir otynnyń sımvolıkalyq alaýyn óńir basshysy Altaı Kólginov pen eńbek ardageri Muqsı Bekqalıev tutatty.
Aıta keteıik, búgingi tańda Batys Qazaqstan oblysynyń 4 aýdany tabıǵı gazben tolyq qamtylyp otyr. 2018 jyldyń qorytyndysy boıynsha oblys halqynyń tabıǵı gazben qamtylýy 95,4%-ti qurady. Árıne, gazdandyrý jumystary jalǵasady. Kelesi jyly Qaztalov aýdanynda – 13 aýylǵa, Terekti aýdanynda – 7 eldimekenge – barlyǵy 20 aýylǵa gaz qubyryn tartý josparlanǵan.
Qazbek QUTTYMURATULY,
«Egemen Qazaqstan»
