14-17 jeltoqsan aralyǵynda osy qos azamattyń júldesi úshin Almaty oblysy Eńbekshiqazaq aýdanynyń Joldybaı Qaıypov atyndaǵy aýylynda bokstan respýblıkalyq týrnır ótedi. Táýelsizdik kúnine oraı uıymdastyrylyp otyrǵan aıtýly jarysta 2003-2004 jáne 2005-2006 jyldar aralyǵynda týǵan 200-ge tarta bylǵary qolǵap sheberleri baq synaıdy. Osy básekeni tamashalaý úshin bokstan Olımpıada chempıony Ermahan Ybyraıymov, erkin kúresten Olımpııa oıyndarynyń jeńimpazy, álemniń bes dúrkin chempıony Hadjımýrat Gasalov, dzıýdodan álem chempıonatynyń kúmis júldegeri, sambodan álem chempıony Azamat Muqanov, elimizge eńbek sińirgen jattyqtyrýshylar Tursynǵalı Edilov pen Murat Sıqymbaev jáne taǵy basqa ataqty sportshylar men bapkerler Joldybaı Qaıypov atyndaǵy aýylǵa at basyn burady.
Shyńǵys Qasymov pen Qanat Jaqypbaevtyń ekeýi de kezinde bokspen shuǵyldanyp, sport sheberligine úmitker dárejesine deıin jetti. Oblystyq jáne respýblıkalyq týrnırlerde júlde aldy. Keıinnen djıý-djıtsý ónerine myqtap den qoıyp, kóptegen dúbirli dodalarda jeńis tuǵyryna kóterildi. Tarqatyp aıtsaq, álem jáne Azııa chempıonattarynda úsh retten bas júldeni oljalaǵan Shyǵys Qasymov búgingi tańda jekpe-jektiń bul túrinen tórtkúl dúnıedegi eń myqty sportshylardyń sanatyna erkin qosylyp otyr. Sol sekildi Qanat Jaqypbaevtyń da bir basyna jeterlik ataq-dańqy bar. Ol álem jáne Azııa chempıony.
Ǵalym SÚLEIMEN,
«Egemen Qazaqstan»
