Semınar-keńes barysynda oblysta energetıka jáne turǵyn úı-kommýnaldyq sharýashylyǵy salasynda Memleket basshysynyń tapsyrmasyn oryndaý boıynsha sharalar júrgizilip jatqandyǵy atap aıtyldy.
– Energııa únemdeý men energııanyń tıimdiligin arttyrý, tarıfterdi azaıtý, kommýnaldyq bý qazandyqtarynda jaǵylatyn otyndy únemdeýge umtylýdamyz. Bıyl Esil qalasy men Shańtóbe kentinde bý qazandyqtary iske qosyldy. Bul jobalar jáne birqatar energııa, jylý, sýmen qamtamasyz etý jáne sý taratý nysandary «Nurly jol» baǵdarlamasy aıasynda júzege asyryldy. Bıyl Kókshetaý qalasyndaǵy jylý elektr ortalyǵyn jobalaý jáne onyń qurylysy boıynsha memlekettik-jekemenshik seriktestigi kelisim-shartyna qol qoıyldy. «EKSPO-2017» halyqaralyq kórmesinde usynylǵan tehnologııalardyń jobalaryn engizý sharalary júzege asyrylýda. Degenmen, energetıka jáne turǵyn úı-kommýnaldyq sharýashylyǵy salasyn jańǵyrtýdaǵy sharalar áli de jetkiliksiz,–dedi oblys ákiminiń orynbasary Vasılıı Krylov.
Semınarda bilim oshaqtary basshylaryn sharýashylyq jumysynan bosatý máselesi de qadap aıtyldy. Mundaı tájirıbe barshylyq. Oblystyq bilim basqarmasy basshysynyń orynbasary Valerıı Gamazov bilim salasyndaǵy bý qazandyqtardyń búgingi jaǵdaıy jóninde habarlama jasady. Oblystaǵy qala men aýdandardyń bilim bóliminde 555 mektep pen 137 balabaqsha jumys isteıdi. Olardyń 173-i ortalyq jylýmen, 519-y avtonomdyq, onyń ishinde 469 mektep pen 50 balabaqsha avtonomdyq jylý júıesimen qamtamasyz etilgen. О́tken jyly Selınograd aýdanynda 11 qazandyqty syrtqa shyǵardy. Úsh mektepte bý qazandyqtary jańartyldy. «Rýhanı jańǵyrý» baǵdarlamasy aıasynda Otaýtúsken aýylynda blok-modýldik bý qazandyǵy ornatyldy. Búgingi tańda «Ortalyq jylý taratý kompanııasy» seriktestiginiń senimdi basqarýyna Zerendi, Bulandy, Selınograd jáne Shortandy aýdandarynyń 193 áleýmettik nysany berildi. Atalmysh seriktestiktiń senimdi basqarýynyń artyqshylyǵy úrdistiń sıfrlandyrýynda bolyp otyr. Kompanııa bý qazandyǵy jumysynyń parametrlerin baqylaý boıynsha biryńǵaı dıspetcherlik beket qurady. Bý qazandyqtaryn basqarý kesheni avtomattandyrylǵan. Selınograd aýdany boıynsha ótken jylǵy jylý berý maýsymynda 3 myń tonna kómir únemdeldi. Ol jóninde Selınograd aýdandyq turǵyn úı-kommýnaldyq sharýashylyǵy bóliminiń basshysy Murat Jańabergenov pen «Ortalyq jylý taratý kompanııasy» seriktestiginiń dırektory Málik Jaýkov aıtyp berdi. Budan keıin semınar-keńeske qatysýshylar «STEV-4» ceriktestinde bolyp, «Zeren boilers» atty uzaq janatyn qazandyqtyń tusaýkeserine qatysty. Seriktestik dırektory Anatolıı Stolıarenkonyń aıtýynsha, bul qazandyqdyń paıdaly áser koeffısıenti joǵary. Sondaı-aq, munda kez-kelgen otyn jaǵylady. Qazandyqtyń otyn jaǵý jumysy úsh deńgeıde júrgiziledi.
Baıqal BAIÁDIL,
«Egemen Qazaqstan»
Aqmola oblysy
