Sońǵy jyldary sapaly jobalarymen kózge túsip júrgen «Nurtas prodactioun» stýdııasy jańajyldyq tartý retinde «Qudalar» atty jańa komedııasyn usynady. Fılmde shymkenttik jigit pen almatylyq arýdyń ǵashyqtyq hıkaıasy men birden til tabysa almaǵan jańa qudalardyń arasyndaǵy kıkiljiń baıandalady.
«Bul meniń kınodaǵy debıýtim, sondyqtan qatty ýaıymdadym. Túsirilim toby óte uıymshyl bolyp shyqty. 18 ret dýbl túsirgen qıyn sahnalar da boldy», – deıdi bas keıipker Danııardyń rólin somdaǵan Oljas Rymbaev. Sondaı-aq taspadaǵy Dıanany – Dınara Baqtybaeva, qalalyq qudalardy – Nurtas Adambaı men Jan Izbasar, aýyldan kelgen qudalardy – Raıhan Kalıoldına, Darhan Daıyrbek somdady.
Afrıkanyń Kenııa memleketinde jáne Birikken Arab Ámirlikteriniń Dýbaı qalasynda túsirilgen «Qazaqsha bıznes» serııaly fılmi Afrıkada túsirilgen alǵashqy qazaq kınotýyndysy retinde tarıhta qalatyn syńaıly. Fılm prodıýseri Nurlan Qoıanbaev kórermenderdi kúlkige keneltip, alǵysyn alý úshin aıanyp qalmadyq deıdi. Aıtýynsha, túsirilim bıýdjetine bas-aıaǵy 500 myń AQSh dollary jumsalǵan. Al akterler quramynda jáne kıno mazmunynda aıtarlyqtaı ózgeris joq. «Aldaǵy ýaqyttaǵy maqsatymyz – qazaq kınosynyń eńsesin kóterip, álemdik kıno álemindegi alpaýyttarmen ıyq tiresip, otandyq kınematografııany Gollıvýd deńgeıine jetkizý», degen Nurlan Qoıanbaev kıno óndirisindegi izdenisin qarqyndy jalǵastyra túsetinin baıqatty.
Aıa О́MIRTAI,
«Egemen Qazaqstan»
