Djım Iong Kımniń otstavkasy týraly DB baspasóz qyzmeti habarlady. «О́z isin jaqsy kóretin qyzmetkerge toly mekemeniń prezıdenti bolý men úshin úlken mártebe», delingen habarlamada.
Onyń aıtýynsha, qazirgi tańdaǵy DB jumysy «burynǵyǵa qaraǵanda óte mańyzdy, sebebi álemde jaǵdaıy nashar jandardyń qatary kún sanap ósip keledi. Al klımattyń ózgerýi, indet, ashtyq jáne bosqyndardyń problemalary kúrdelene túsken».
Brıtandyq Guardian basylymynyń habarlaýynsha, jumystan ketý bul − Kımniń jeke sheshimi. Mekemeniń baspasóz baıanynda jazylǵandaı, prezıdent otstavkaǵa ketken soń jeke fırmaǵa basshy bolyp, damýshy elderdegi ınfraqurylymdyq ınvestısııany kóbeıtýmen aınalyspaq.
Sondaı aq DB basshysy 1987 jyly óziniń qatysýymen qurylǵan «Densaýlyq salasy» boıynsha halyqaralyq úkimettik emes uıymnyń basqarma quramyna oralýdy josparlap otyr.
Djon Iong Kım - dúnıejúzilik densaýlyq saqtaý salasy boıynsha bilikti maman.1959 jyly Seýlde dúnıege kelgen. Bes jasynda ata-anasymen birge AQSh-qa kóship ketken. 1991 jyly Garvardtyń medısına mektebinde magıstr, 1993 jyly doktor dárejesin aldy. 2003-2005 jyldar aralyǵynda Dúnıejúzilik densaýlyq saqtaý uıymynyń VICh jáne SPID-pen kúres bóliminde jumys istegen.
Kım ketken soń 1 aqpannan bastap bankti atqarýshy dırektor Krıstalına Georgıeva basqarady.
Aqmaral AǴZAMQYZY,
«Egemen Qazaqstan»
