Ana men bala ulttyq ǵylymı ortalyǵy basshysynyń orynbasary Venera Altynova ortalyqtyń balalar transplantologııasy boıynsha múmkindikterin tanystyrdy. Onyń aıtýynsha 2012 jyldan beri, ıaǵnı 6 jyl ishinde balalarǵa 81 búırek transplantasııasy jasalǵan bolsa, operasııanyń 89 paıyzy Ana men bala ulttyq ǵylymı ortalyǵynda ótken.
«Ana men bala ulttyq ǵylymı ortalyǵynda 2012 jyldan beri termınaldy kezeńdegi búırek, baýyr sozylmaly aýrýlaryn emdeýde joǵary tehnologııalyq ádister engizip keledi. Osynyń arqasynda qazir búırek pen baýyr transplantasııasy úshin naýqas balalar sheteldik klınıkalarǵa barmaıtyn boldy. Qazirgi ýaqytta elimizde 61 bala búırek donoryna, 21 bala baýyr donoryna muqtaj. 2015 jyldan beri balalarǵa máıit aǵzalarynan búırek transplantasııasy jasala bastady. Byltyr almastyrylǵan organdy aǵzasy qabyldamaǵan balaǵa qaıtara búırek transplantasııasy jasaldy. Bul salada aǵzasy almastyrylǵan balalar men transplantattyń aman qalý deńgeıi Eýropa elderimen birdeı. Bizdiń ortalyqta bul kórsetkish 94,4%-ǵa jetip otyr», dedi V.Altynova.
Bul ortalyqta 2014 jyldan bastaý alǵan baýyr transplantasııasy da aıtarlyqtaı damyǵan. Klınıka basshysy qazirge deıin Túrkııanyń Bashkent ýnıversıtettik klınıkasy, Belarýstyń Respýblıkalyq aǵzalar men tinder transplantasııasy ǵylymı-tájirıbelik ortalyǵy mamandarymen birlesip 6 aı men 1 jas 2 aı aralyǵyndaǵy 7 balaǵa baýyr transplantasııasy sátti jasalǵanyn jetkizdi. Onyń ishinde eki transplantasııany ortalyq mamandary ózderi jasaǵan.
Sondaı-aq byltyr kemik maıy transplantasııasy 527 balaǵa jasaldy. Onyń ishinde kúrdeli obyrmen 116 bala, leıkozben 411 bala em alyp shyqty.
Alaıda donor tapshylyǵy balalar transplantologııasynda da túıtkildi másele bolyp otyr. «Jyl saıyn búırekke muqtaj balalardyń qatary 14-18-ge kóbeıip otyrady. Biraq balalardyń keıbiriniń áke-sheshesiniń joq bolýy nemese qan tobynyń sáıkes kelmeýi, ata-anasynyń densaýlyǵynyń bolmaýy, donordyń tabylmaýy jaǵdaıdy qıyndata túsedi. Sondaı jaǵdaılarda máıitten aǵza ala alsaq, balalarǵa jaqsy múmkindik týar edi. Donor bolmaǵandyqtan, kóp bala qaıtys bolyp ketedi» dedi V.Altynova.
Maıgúl SULTAN,
«Egemen Qazaqstan»
