Mysaly, Balqash qalasynda qańyrap bos turǵan kópqabatty úıdiń bir kireberisi 2017 jyly kúrdeli jóndeýden ótkizilip, sonyń nátıjesinde elimizdiń ózge óńirlerinen kelgen 18 jas dáriger baspanaly bolǵan edi. Qazirgi ýaqytta bul tájirıbe oblys boıynsha qanatyn keńge jaıyp, jalǵasyn sátti taýyp keledi.
Jańa jyldan beri Balqash qalasynyń taǵy 16 otbasy qyzmettik baspanaǵa ıe bolyp, qýanyshqa bólendi. Bul joly jas mamandarǵa jergilikti medısınalyq kolledj jataqhanasynyń jaıly páterlerge aınaldyrylǵan bir qabatynan baspana buıyrdy. Munda turmysqa qajetti jabdyqtyń bári bar: páterler jıhazben, basqa da kerek-jaraqpen mekeme atynan qamtamasyz etilgen.
– Biz joldasymyz ekeýimiz Balqash qalasyna Almatydan keldik. Men S.Asfendııarov atyndaǵy Qazaq ulttyq medısınalyq ýnıversıtetin támamdadym. Qazir jergilikti emxanada jalpy tájirıbe dárigeri bolyp qyzmet etemin. Biz oqyp jatqan kezde jergilikti mamandar kelip, jumysqa shaqyryp, sharttar týraly aıtqan bolatyn. Olar ýádelerin oryndady. Eń bastysy, baspanamen qamtamasyz etti. Páter óte jaqsy, jyly, terezeden kól kórinip turady, – deıdi jas maman Sandýǵash Ábdázimova qýanyshyn jasyra almaı.
– О́tken jyldyń qyrkúıek aıynda bizge Almaty, Astana qalalarynan, qazirgi Túrkistan oblysynan jas mamandar keldi. Olar ortalyq aýrýxana, emxana, psıxonevrologııalyq dıspanser sııaqty medısınalyq mekemelerge jumysqa ornalasty. Biz jas mamandarǵa ýaqytsha jaldamaly páterler berdik, al qazir olar jataqxananyń besinshi qabatyndaǵy jaıly páterlerge qonystanyp jatyr. Munda barlyq jaǵdaı jasalǵan, turǵyndar tek jaldaý aqysyn ǵana tóleıdi, – deıdi Qaraǵandy oblystyq densaýlyq saqtaý basqarmasynyń Balqash qalasyndaǵy aýmaqtyq ókilettilik bóliminiń jetekshisi Sholpan Qalyqbekova.
Jaýapty mamannyń aıtýynsha, Balqash qalasy boıynsha salalyq medısına mamandaryna degen qajettilik áli de kún tártibinen túspegen. Máselen, reanımatolog, nevrolog, akýsher-gınekolog, sondaı-aq jalpy tájirıbe dárigerleri sııaqty mamandyq ıelerine suranys bar eken. «Bizdiń bolashaqtaǵy josparymyz zor. Bul másele tolyq sheshimin tapqanynsha, biz baǵdarlama jospary boıynsha bul tájirıbeni ári qaraı jalǵastyra beretin bolamyz», deıdi Sh.Qalyqbekova.
Qaırat ÁBILDA,
«Egemen Qazaqstan»
Qaraǵandy oblysy
