О́tken jyly «Nur Otan» partııasy men «Jas Otan» Jastar qanaty «Bilim Ortalygy» jobasy barysynda óńirlik kitaphanalardy jańǵyrtý maqsatynda jańa formattaǵy jastar bilim ortalyqtaryn qurýǵa kiristi. Nátıjesinde aımaqtyq kitaphanalardyń qyzmetkerleri úshin Astanada arnaıy trenıng uıymdastyrylyp, jastarǵa arnalǵan zamanaýı bilim ortalyqtary ashylǵan edi. Ár aımaqtan barlyǵy 34 qyzmetker kitaphana jumysyn jańa tehnologııalardy qoldaný arqyly búgingi kúnniń talabyna saı beıimdeý taqyrybynda biliktilikterin arttyrdy.
Jastar jylyndaǵy alǵashqy sharalardyń biri aımaqtaǵy belsendiler úshin kitaphanalardan bastaldy. Kúni boıy ár kelýshiniń qyzyǵýshylyǵyna saı keletin alýan túrli sharany uıymdastyrýǵa tyrysqan Jasotandyqtar budan keıin de aımaq jastaryn jańa bilim ortalyqtaryna kelýge shaqyrdy.
Osy kúni ortalyqtardyń biri L.N. Tolstoı atyndaǵy Qostanaı oblystyq ámbebap ǵylymı kitaphanasynda ashyldy. Al qaraǵandylyq jastar Bookdating barysynda ózderine unaǵan bir týyndyny tanystyryp, alyp kelgen kitaptaryn qatysýshylar arasynda oqymaǵan kitappen aıyrbastap aldy. Jastar osy toppen aldaǵy ýaqytta da oqyǵan kitaptaryn talqylap, ózara almastyryp turýǵa kelisti.
Shyǵys Qazaqstan jastary oblystyq kitaphanada ǵulama oıshyl ál-Farabıdyń eńbekterine arnalǵan burysh ashty. Sondaı-aq Aqmola oblysyndaǵy bilim ortalyǵyna kelgender óńirdiń tabysty kásipkerlerimen kezdesip, óz isin bastaýǵa qatysty suraqtaryna paıdaly keńester alsa, atyraýlyq jas kóshbasshylar sheshendik ónerdi damytý boıynsha trenıngten ótti. Al Oral qalasynyń jastary úshin festıval «Bilgirler báıgesi» zııatkerlik oıynymen bastalyp, belsendilerge ýaqytty tıimdi paıdalaý men kóshbasshylyq qasıetterin damytýǵa arnalǵan trenıngpen jalǵasty.
Barlyq óńirlerde pikir almasý alańdarynda jastar men mamandar qazirgi qazaqstandyq bilim berýdegi pedagog mártebesine qatysty pikirlerin ortaǵa saldy. Sharaǵa kelgen mektep pen joǵary oqý oryndarynyń qyzmetkerleri de pikirtalasqa belsene qatysty. Sonymen qatar aqyn-jazýshylardyń ómiri men shyǵarmashylyǵyna arnalǵan keshterge jastar kóp jınaldy. Shara shet tilin meńgerýshilerge arnalǵan aǵylshyn tilindegi jáne «Bolashaq Qaýymdastyǵy» aýdarǵan qazaq tilindegi fılmderiniń kórsetilimimen aıaqtaldy.
«Bilim festıvaliniń basty maqsaty jastarǵa aımaqtarda jańadan ashylǵan bilim ortalyqtarynyń barlyq múmkindikterin kórsetýmen qatar, olardy kitaphanalarda bos ýaqytyn kóptep ótkizýge shaqyrý boldy» - deıdi uıymdastyrýshylar.
