Memleket basshysy Nursultan Nazarbaevtyń jastarmen júzdesýin kógildir ekrannan kórgen Jetisý jastary ózderin tolǵandyrǵan jaıttardyń sóz bolyp, naqty sheshimder qabyldaý jaıyndaǵy tapsyrmany jyly ásermen qabyldady.
Jyl jańalyǵynyń resmı jarııalanýyn úlken múmkindikterge balaǵan I.Jansúgirov atyndaǵy Jetisý memlekettik ýnıversıtetiniń stýdentteri atqaratyn isterine jospar quryp ta úlgeripti.
– Maǵan Elbasynyń volonterlyqpen aınalysatyn joǵary oqý oryndarynyń stýdentterine kóńil bólý kerek degen sózi qatty unady. Sebebi, ózim 2-kýrstan beri volonterlyqpen aınalysamyn. Bilim alyp jatqan oqý ordamyzda «Alaý» jáne «Rise up» eriktiler klýby bar. Onyń qurylýyna ózim at salystym. «Alaý» tobyndaǵy eriktiler qart kisilerge, áleýmettik jaǵdaıy tómen otbasylaryna kómek qolyn sozsa, «Rise up» toby Taldyqorǵan qalasyndaǵy «Aınalaıyn» balalar úıiniń tárbıelenýshilerine aǵylshyn tilin úıretedi. Sonymen qatar «Nur Otan» partııasynyń qalalyq fılıalymen birlesip, múmkindigi shekteýli balalardyń sabaqqa daıyndyǵyna kómektesedi. Bizdiń osy bastamalarymyzdy ókimettiń ózi qoldap, volonterlarǵa jaǵdaı týǵyzyp jatsa, bizdiń isimiz alǵa basary anyq. Biz osyndaı meıirimdilik isimizben ózgege úlgi bolyp, adamgershilik turǵydan da ósip, damımyz dep sanaımyn. Jalpy men bilim alyp jatqan Jansúgirov ýnıversıtetinde jastardy qoldaýǵa zor múmkindikter bar. Bıylǵy jyldyń ereksheligine oraı bilim ordasyndaǵy múmkindikter eki eselenedi dep oılaımyn, - deıdi jetisýlyq jas volonter, stýdent Aıda Ryshanova.
«Jastar jylynyń» saltanatty ashylýyn stýdenttermen birge kórgen I.Jansúgirov atyndaǵy Jetisý memlekettik ýnıversıtetiniń rektory Qýat Baımyrzaev stýdentterdi «Jastar jylymen» quttyqtap, aldaǵy ýaqytta jastar úshin atqarylatyn aýqymdy sharalar men úlken jobalar uıymdastyrylatynyn jetkizdi.
Qalmahanbet MUQAMETQALI,
«Egemen Qazaqstan»
Almaty oblysy
