Memleket basshysynyń «Uly dalanyń jeti qyry» atty maqalasynda túp-tamyrymyzdy bilýdiń, ulttyq tarıhymyzǵa tereń úńilip, jańǵyrý jolynda jańa qadamdar jasaýdyń mańyzy jaıly basa aıtylǵan. Ultymyzdyń órkenıet jolyndaǵy ǵumyry, Uly dalanyń tarıhı úzdiksiz damýyn birneshe dáıekteme arqyly kóz aldymyzǵa keltiredi. Ulttyq jańǵyrýǵa jol alǵan elimizdiń sonaý ǵasyrlardan kele jatqan mádenı jetistikteri dalamyzǵa syrttan kelmeı, kerisinshe, baıtaq ólkemizden tamyr jaıyp, Batys pen Shyǵys, Kúngeı men Teriskeıge taralǵanyn alǵa tartady. Týǵan topyraǵymyzdan tabylǵan tarıhı jádigerler Uly dalanyń jahandyq tarıhtan oıyp turyp oryn alatynyn moıyndatpaı qoımaıdy. Bir ǵana atty qolǵa úıretip, túrli maqsatta qoldana bilgen, buryn-sońdy bolmaǵan jańa quraldar oılap taýyp, ǵylym úshin sensasııa sanalǵan «Altyn adamnyń» tabylýy, eń kóne jazý óneriniń bizde bolǵanynyń dáleldenýi álemdik teńdessiz revolıýsııaǵa jol ashqan ata-babamyzdyń salǵan sara jolyna, ulttyq tarıhymyzdyń kókjıegine keńinen kóz tastap, tereń zerdeleýdi talap etedi.
Tarıh tolqynyndaǵy aqtańdaqtardy qalpyna keltirý maqsatynda iske asyrylǵan «Mádenı mura» baǵdarlamasynyń izimen tarıhı sanany jańǵyrtý maqsatynda túrli jobalardyń qajettigi kórinedi. Osy maqsatta Elbasymyz tarapynan óz maqalasynda álem boıynsha elikteýge laıyqty Uly dalanyń uly tulǵalar shoǵyryn jasaý úshin «Uly dalanyń uly esimderi» oqý-aǵartý saıabaǵyn ashý, «Arhıv − 2025» jetijyldyq jobasyn qolǵa alyp, «Túrki órkenıeti: túp-tamyrynan qazirgi zamanǵa deıin» atty jobanyń júrgizilýiniń mańyzyn, máńgi ólmeıtin ulttyq aspaptarmen oryndalatyn týyndylar toptamasyn jasap shyǵarý, Uly dalanyń ulttyq murasyn, sanasyn jańǵyrtý maqsatynda halyqtyń tanymynda erekshe oryn alatyn kıno óneri arqyly dáripteý de kózdelgen.
Elbasymyzdyń «Bolashaqqa baǵdar: rýhanı jańǵyrý» maqalasynyń jalǵasy retinde jaryq kórip, el tarıhy, bolashaǵy jaıly qanshama qundy dúnıeler qamtylǵan. Rýhanı túlep, sana-sezimimizdi jańǵyrtý úshin, eń áýeli, tarıhymyz jaıly taptaýryn qaǵıdalardan pikirlerden arylýymyz shart. Kósh basyndaǵy eldermen terezemizdi teńep, ıyq túıistirip, teńdeı turý úshin ózgerýdi ózimizden bastaýymyz kerek. О́tkenimizben sanasa otyryp, jańa dáýirdiń jaǵymdy jaqtaryn boıǵa sińirip, jas urpaqqa mol mádenı murany jetkize bilý − búgingi kúnniń talaby.
Batjan MÁJITOVA,
Qorǵaljyn aýdandyq Tilderdi damytý ortalyǵynyń dırektory
Aqmola oblysy
