Astana qalasy Polısııa Departamentiniń baspasóz qyzmetinde belgili bolǵandaı, 24-26 qańtar aralyǵynda polısııa qyzmetkerleri qalada «Svetmet» tekserý is-sharalaryn júrgizýde.
Jergilikti polısııa qyzmeti basqarmasynyń qyzmetkerleri Astana qalasy PD krımınaldy polısııa basqarmasy qyzmetkerlerimen birlesip, urlanǵan kabelderdi, akkýmýlıatorlardy, kanalızasııalyq lıýk qaqpaqtaryn, qurylys materıaldary men qara jáne tústi metalldardy qabyldaıtyn oryndardy anyqtaý maqsatynda reıdtik sharalardy júrgizip jatyr.
«О́tken táýlikte polısııa qyzmetkerleri metall qabyldanatyn 30-ǵa jýyq oryndy tekserdi. Tekseris jumystarynyń nátıjesinde Qazaqstan Respýblıkasynda turý erejelerin buzyp, esh tirkeýsiz nemese jeke basty kýálandyratyn qujatsyz júrgen 20 adamǵa qatysty Ákimshilik quqyqbuzýshylyqtar týraly kodeksiniń 492 babyna sáıkes ákimshilik is qozǵaldy», - delingen habarlamada.
Úshkópir kóshesindegi metall qabyldanatyn pýnkterdiń birinen polısııa qyzmetkerleri tústi metalldyń 100 kelisin (kabel) anyqtady. Aıǵaqty zat tárkilenip, tekserý amaldary júrgizilýde.
