TEDx formatynda ótken sharada spıkerler ózderiniń tabysty keısteri, kásipkerlik salasyndaǵy memlekettik qoldaý jáne jastar saıasaty týraly áńgimeleıdi, kásipkerlikti bastaý men ony damytý aıasynda bilgenimen bólisti. Forým negizinen jas kásipkerlerdiń agrarlyq sektordaǵy, ǵylymdaǵy, jeńil ónerkásiptegi, jasyl tehnologııalardy damytýdaǵy bıznes bastamalaryn, startap-jobalaryn qoldaýdy kózdeıdi.
Is-shara barysynda kásipke bet burǵan jandardyń jumystaryn kórsetetin kórme uıymdastyrylǵan. Kórmede qazaqy naqyshpen zamanaýı materıaldardan tigilgen kostıýmder kózge jyly ushyrasty. Kórkem jumystardyń ıesin sózge tartqanymyzda onyń áıgili Ábilhan Qasteevtiń shóberesi ekenin bildik. Qazaq Ulttyq óner ýnıversıtetinde «Kostıým sýretshisi, teatr jáne kıno» mamandyǵynyń 4 kýrsynda oqıtyn Aısánim Qasteeva kórmege qoıylǵandar – semestr saıyn ótkizetin emtıhan jumystary ekenin aıtty. Stýdenttiń dıplomdyq ta emes, kóp emtıhandarynda tikken kıimderi men istegen buıymdary shynynda kóz tartarlyq. Bir kıimniń arqasyna uzatylǵaly turǵan qyz kelbetin beınelese, ekinshi birinde uzatý aldyndaǵy sáýkeleli qyz ben ony shyǵaryp salyp turǵan sulý qurbysynyń qımastyq sezimin sýrettegen.
«О́zimniń avtorlyq oıýlarym bar, atamnyń qaldyrǵan baı murasy da birazǵa azyq. Sonyń bárine oqý ornynda jıǵan bilimimdi qosyp, kıim arqyly ultymyzdyń dástúrlerin kórsetkim keldi», deıdi ol. Aısánim sharaǵa «Sheberler alıansy» qoǵamdyq qorynyń shaqyrtýymen kelgen. Aǵylshyn tilin jetik meńgergen sheber qyz bolashaqta umytylyp bara jatqan ádet-ǵuryptarymyzdy aǵylshyn tilimen qatar úıretýdi kózdeıdi. Álemde qazir brendke aınalǵan tildiń arqasynda ulttyq naqyshty da qaıta jańǵyrtýdy josparlaıdy. «Osyndaı baǵytta oqytatyn balalar ortalyǵyn ashqym keledi. Joba kóp, qarjy jaǵy qınaıdy, jolymyzdy keskesteıdi. Osy forýmǵa sol máselemdi sheshý nıetinde keldim, mesenattardan qoldaý kútemin», deıdi ol. Qazaqstan halqy Assambleıasy Tóraǵasynyń orynbasarlary Leonıd Prokopenko «Dostyq úıinen» sheberhana berýge ýáde etipti.
Aıdana ShOTBAIQYZY,
«Egemen Qazaqstan»
