Jankúıerlerdiń bastamasymen «Halyq Arena» keshenin sportshynyń esimine aýystyrý týraly onlaın petısııa ázirlengen.
«Biz, Denıs Tenniń jankúıerleri, dostary, ony jaqsy kóretin jandar Almaty ákimdiginen Almaty qalasy Qulja trakt, 2 kóshesinde ornalasqan Halyq Arena muz aıdynynyń ataýyn táýelsiz Qazaqstan tarıhynda Olımpıada oıyndarynyń (2014), Álem chempıonattarynyń (2013, 2015), Tórt kontınent chempıonatynyń (2015), Qysqy ýnıversıada, Qysqy Azııa oıyndarynyń medalderine (2017) ıe bolǵan birinshi jáne jalǵyz qazaqstandyq mánerlep syrǵanaýshy, ISÝ týrnıriniń medalin jeńip alǵan, Qazaqstan Respýblıkasynyń eńbek sińirgen sheberi, almatylyq Denıs Tenniń atyna aýystyrý máselesin qaıta qaraýdy suraımyz.
Denıs Ten qazaqstandyq mánerlep syrǵanaýdyń betkeustary boldy, elimizdegi sporttyń bul túriniń negizin qalaýshy jáne Qazaqstannyń halyqaralyq sport ımıdjiniń nyǵaıýyna ózindik úlesin qosty.
Denıs ómirin eliniń ósip-órkendeýine arnady, shyǵarmashyl jastarǵa , jas sportshylarǵa jáne otandastaryna shabyt syılady.
Biz, Qazaqstan azamattary qazasy álemdi qaıǵyrtqan kórnekti mánerlep syrǵanaýshynyń esimin muz aıdynyna berýdi jón sanaımyz jáne onyń esimin osylaı ardaqtaǵymyz keledi», - delingen petısııada.
Búginge deıin onlaın petısııaǵa 11 myńnan asa adam qol qoıǵan.
