Oblys elden jyraqtaǵy qandastarymyz ben eńbek kúshi jetkilikti óńirlerdiń turǵyndaryn kóshirip ákelý jumystaryn odan ári jalǵastyrýda. Máselen, 2018 jyly aımaqqa 1816 adam (608 otbasy) kóship kelipti. Elimizdiń ońtústik óńirlerinen Shyǵysqa qonys aýdarǵan turǵyndardyń mamandyqtary - qazaq jáne aǵylshyn tilderi, deneshynyqtyrý jáne eńbek pánderiniń muǵalimderi, psıhologtar, dárigerler, býhgalterler, elektromonterlar, veterınarlar.
Qazirgi ýaqytta oblysqa qazyq baılaǵan 483 eńbekke jaramdy adamnyń 364-i ózderine jumys taýypty. Jergilikti bılik olardyń arasyndaǵy kásip ashýǵa nıetti azamattarǵa oılaryn iske asyrýlary úshin 100 AEK (aılyq eseptik kórsetkish) deıin granttar bólýde. Grantqa qoly jetken oblystyń jańa turǵyndarynyń biri pesh satyp alyp, tandyr pisirýge kirisse, ekinshisi qonaq úı men dámhanany jalǵa alyp, sharýasyn dóńgeletýde. Memleket kóship kelýshilerge qonys aýdarý shyǵyndary men baspana satyp alýlary úshin sýbsıdııa beredi. Olar úshin arnaıy turǵyn úıler de salynýda.
Máselen, Shemonaıha aýdanynda ótken jyly kóship kelýshilerge 60 páterli turǵyn úı paıdalanýǵa berildi. 2019 jyly «Serpin» baǵdarlamasy boıynsha jergilikti oqý oryndaryn 208 stýdent támámdaıdy. Baǵdarlama shartyna sáıkes oqý ornyn bitirgen túlekter bizdiń oblysta úsh jyldan kem emes merzim eńbek etýleri tıis. «Biz bul máselege memlekettik múdde turǵysynan qaraýymyz qajet. Oblystyń shalǵaıdaǵy shekaralyq aýdandarynan adamdar kóship jatyr. Ol jaqtarǵa jumys kúshi kerek. Al ońtústikte bizdiń jaqqa kóship kelýge daıar otyrǵan adamdar bar. Biz olardy ózimizge tartýymyz qajet. Munyń eshqandaı saıası astary joq, qalypty ekonomıkalyq, ýrbanızasııalyq úrdis. Ońtústik óńirlerde halyq asa tyǵyz qonystanǵan. Infraqurylym nysandary – mektepter, balabaqshalar jetispeıdi. Osy rette teńgerimdi qamtamasyz etý úshin eńbek resýrstaryn durys bóle bilý qajettiligi týyndaıdy»,- deıdi oblys ákiminiń orynbasary Ásem Núsipova.
Qazaqstanda eńbek kúshi artyq óńirler qataryna Almaty, Jambyl, Túrkistan, Mańǵystaý, Qyzylorda oblystary jáne Shymkent qalasy kiredi.
Azamat QASYM,
«Egemen Qazaqstan»
Shyǵys Qazaqstan oblysy
