– Erlan aǵamyzdyń kıiktiń laǵyn kóterip turyp túsken sýretterinen meniń kózime jas irkildi. Qandaı shynaıylyq deseńshi! Fotosýretshi de osy sátti obektıvke sátti ilgen eken. Men túnimen uıyqtamadym, plastılındi aldym da qoryqshynyń osy bir beınesiniń músinin jasaýǵa otyrdym, jasap shyqtym, – deıdi Ásel.
Sýretshi qyzdyń apasy bul músin men sińlisiniń jalpy shyǵarmashylyǵy týraly jazyp, áleýmettik jelilerge sala qoıady. Músindi kórgen kóptegen kisiler Áselge habarlasypty. Ásirese Erlannyń qaryndasy, qoryqshy jumys istegen mekemeniń basshysy habarlasyp, sátti shyqqan dúnıege rahmet aıtypty. Áleýmettik jelide kózdi ashyp-jumǵandaı jyldamdyqpen taraǵan músindi kórgender áli de Áselge habarlasyp, qoryqshyǵa osyndaı eskertkish qoıý kerek degen óz pikirlerin aıtyp jatyr eken.
Qostanaı memlekettik pedagogıkalyq ınstıtýtynan (búginde ýnıversıtet) syzý jáne beıneleý óneri mamandyǵy boıynsha bilim alǵan Ásel qazir ózi týyp-ósken Lısakov qalasyndaǵy «Bolashaq» balabaqshasyndaǵy baldyrǵandarǵa «Beıneleý óneri men modeldeý» úıirmesin júrgizedi. Áseldiń halqymyzdyń etnografııasyn tereń zertteýge umtylýy, onyń óz shyǵarmalarynan kórinis tabýy belgili óner sańlaqtarynyń da nazaryna iligip, jaqsy baǵasyn alyp úlgerdi. Esimi syrt elderge máshhúr sýretshi, Memlekettik syılyqtyń laýreaty Erbolat Tólepbaı Qostanaıǵa kelip, Kórkemsýret galereıasyn aralap kóredi. Kóp jumystyń ishinen Ásel salǵan «Kelin» sýretiniń tusyna kidirip, ony joǵary baǵalapty. Kórkemsýret galereıasy qyzmetkerleri arqyly Ásel shyǵarmashylyǵyna tabys tilep, batasyn berip ketipti.
Erlikpen qaza tapqan qoryqshy Erlan Nurǵalıevtiń áriptesteri men týystarynyń, jalpy kópshiliktiń habarlasýy Ásel Tileýlenniń shyǵarmashylyǵyna qanat bitirgendeı boldy. Ol endi Erlan Nurǵalıevtiń músinin sapasy basqa, keptirse qatyp qalatyn plastılınnen qaıta jasap shyǵýdy oılastyryp otyr.
– Erlik umytylmaıdy. Men de erlikti óz shyǵarmamda dáriptep, qoryqshyǵa máńgi ómir syılaǵym keledi, – deıdi Ásel.
Názıra JÁRIMBET,
«Egemen Qazaqstan»
Qostanaı oblysy,
Lısakov qalasy
