Men Jastar jylynyń ashylý saltanatynan erekshe áser aldym desem artyq aıtqandyq bolmas. Prezıdentimiz barsha jastardy ózderiniń əleýetin belsendi júzege asyrýǵa, múmkindikterin barynsha paıdalanýǵa, zamanaýı bilim alyp, kúnnen-kúnge shyńdala túsýge shaqyrdy. Bul sózder ǵylym, óner, jeke kásiptegi, sporttaǵy zamandastarymyzǵa serpilis ákeleri sózsiz.
Elbasynyń 2019 jyldy Jastar jyly dep belgileýiniń ózi jastar úshin úlken mártebe. Endigi mindet – bizge artylǵan jaýapkershilik údesinen shyǵa bilý. Mádenıet pen sport salasyndaǵy jastar bıyl kórsetkishterin eselep, buryn arman bolǵan shyńdaryn baǵyndyraryna senimdimin.
Máselen, qazir kıno salasynda atqarylar jumystar kóp. Máselen, Elbasynyń byltyrǵy Joldaýynan keıin Senat depýtaty Darıǵa Nazarbaevamen kezdesýlerdiń birinde ulttyq máni bar fılmderdiń sanyn kóbeıtip, patrıottyq rýhtaǵy 50 kıno túsirýge usynys jasadym. Ol tek tarıhı kınolarmen shektelip qalmaýy tıis. Dálirek aıtqanda, osy táýelsizdik jyldary ishinde eren eńbekterimen, kózsiz batyrlyqtarymen kózge túsken qyz-jigitter barshylyq. Mysaly, Bekzat Sattarhanov tárizdi aǵalarymyz týraly fılmder jastarǵa qýat beretini anyq. Sonymen qatar tek sportpen ǵana shektelmeı, ǵylym, medısına, óndiristegi jastarymyz da tym jaqsy keıipkerlerge aınalar edi. Mine, osy jobalar júzege asaryna senimdimin.
Asylhan TО́LEPOV,
teatr jáne kıno akteri
