Aqtóbe oblysynyń ákimi Berdibek Saparbaev Úkimettiń 30 qańtar, sársenbi kúni ótken keńeıtilgen otyrysynda Memleket basshysy bergen tapsyrmalardy júzege asyrýǵa baılanysty jıyn ótkizdi. Oǵan memlekettik organdardyń, kommýnaldy kásiporyndardyń, qoǵamdyq uıymdardyń basshylary jáne t.b. qatysty.
Berdibek Saparbaev: «Bizdiń basty mindetimiz – Prezıdent tapsyrmasyn sapaly ári belgilengen merzimde oryndaý. Elbasy qoıǵan mindetterdiń barlyǵy da halyqtyń ál-aýqatyn jaqsartýǵa baǵyttalǵan. Eń aldymen, bes áleýmettik bastamany sapaly júzege asyrý kerek. Biz qazirgi tańda «7-20-25» baǵdarlamasy boıynsha barlyq rezervterdi paıdalanyp otyrǵan joqpyz. Oblys ótken jylǵy ekonomıka ósimin 5%-ben aıaqtady, osy jyly odan kem bolmaýy tıis. Jumysqa jyl basynan-aq belsendi aralasyp, memlekettik baǵdarlamalardyń tıimdi júzege asyrylýyn qamtamasyz etý qajet», - dep atap ótti.
Oblys ákimi Jastar jylynyń tıimdi júzege asyrylýyna, sonyń ishinde jastar kásipkerligin damytýǵa nazar aýdardy. Aıta keteıik, jalpy, shaǵyn jáne orta bıznesti nesıeleýge bıyl 5 mlrd teńge aýdarylmaq. Qaryzdy ýaqytynda jáne 100% berý, qarajatty ıgerý tapsyryldy.
О́nerkásip salasynda ımportty almastyrý jáne eksport ónimin arttyrý jobasyn júzege asyrýǵa basymdyq beriletin bolady. «Bıyl Úkimet ımportty almastyrý men eksporttaýǵa baǵyttalǵan jobalardy qoldaý úshin 600 mlrd teńge bóledi. О́ndiristiń ázirlengen teńgerimi men oblystyń tutynýy negizinde basym jobalardy anyqtap, olardyń atalǵan baǵdarlamaǵa engizilýine jumystanýdy tapsyramyn. Otandyq avtoónerkásipti qoldaýdyń jańa baǵdarlamasy iske qosylady. Oblystyń oǵan qatysý áleýetin, sonymen qatar, avtoomobıl, quramdas bólshekter, aýyl sharýashylyǵy tehnıkasy óndirisiniń múmkindigin qarastyrý kerek», - dedi Berdibek Saparbaev.
Memleket basshysynyń azamattardy baspanamen qamtamasyz etý tapsyrmasyn oryndaý maqsatynda bıyl Aqtóbe oblysynda kem degende 1 mln sharshy metr turǵyn úıdi paıdalanýǵa berý josparlanyp otyr. Sondaı-aq, qurylystaǵy jergilikti qurylys materıaldarynyń mazmunyn qazirgi 85 paıyzdan 90 paıyzǵa deıin arttyrý mindeti tur.
Oblys ákimi: «Jańa kóppáterli úılerdiń birinshi qabattarynda áleýmettik nysandar salý kerek, máselen, balabaqsha, medısınalyq nemese polısııa beketterin, mektepten tys balalar mekemesin. Búginde birinshi qabattardy negizinde kommersııalyq alańdar retinde salady, biraq bul áleýmettik nysandar turǵyndarǵa anaǵurlym mańyzdyraq ári qajet», - degen senimde.
Aýyl sharýashylyǵynyń ósý rezervi kóbirek. Prezıdent tapsyrmasyna sáıkes, aýyl sharýashylyǵynda osy jyly jańa tehnologııalardy engizý, mal jáne ósimdik sharýashylyqtarynyń ónimdiligin kóterý, memlekettik-jeke seriktestikti, sonyń ishinde sýarmaly eginshilikti, aýyl sharýashylyǵy ónimderi baǵasynyń negizsiz ósýine jol bermeý úshin kóterme-taratý ortalyqtarynyń jelilerin damytý jumystary basym. Taǵy bir mindet – aýyl sharýashylyǵy ónimderin qaıta óńdeıtin jáne azyq-túlik qaýipsizdigin qamtamasyz etetin kásiporyndardy barynsha iske qosý.
«2018 jyly sýarmaly jerler alańy 30,2 myń gektarǵa deıin ósti, osy jyly 40 myń gektarǵa jetkizý kerek. Aýyl sharýashylyǵyndaǵy qaıta óńdeý jyl saıyn 5-7 paıyzǵa ósip keledi, biraq et, sút kombınattarynyń qýattylyǵy báribir 50% ǵana iske qosylǵan. Olaı bolmaıdy. Bizde sol sút pen sút ónimderine degen qajettilikti tolyqtaı qamtamasyz etetin áleýet bar. Memleket qoldaýy bar. Tek sút jınaıtyn kásiporyndardy biriktirý jáne sút taýarly fermalardy qurý jumystaryn kúsheıtip, shıkizatty jınaý jaǵyn jolǵa qoıý qajet. Aýyl turǵyndaryna sútterin qaıta óńdeý kásiporyndaryna tapsyra alatyndaryn túsindirý kerek. Mysaly «Aıs» JShS bir lıtr sútti 100 teńgege satyp alady. Bul aýyl turǵyny úshin úlken kómek. Sondaı-aq, 2019 jyly et eksportynyń kólemin 4 myń tonnaǵa deıin ulǵaıtyp, eksportqa jiberiletin aýyl sharýashylyǵy ónimderin qaıtadan tereńdeı óńdeıtin jańa óndiris oryndaryn qurýǵa erekshe kóńil bólgen jón», - dedi óńir basshysy.
Sonymen qatar, Aqtóbe oblysynda bıyl óńdeý ónerkásibi salasyndaǵy jobalardy júzege asyrý, jekeshelendirý, ınvestısııa tartý, ShOB-ti damytý, qarjy júıesiniń turaqtylyǵyn qamtamasyz etý, kóleńkeli aınamlymmen kúres, jumysshylardyń quqyqtary men eńbek zańnamasynyń buzylýynyń jolyn kesý, mektepterdi Nazarbaev zııatkerlik mektebiniń standarttary boıynsha jaraqtandyrý jáne ádistemelerin taratý, joǵary jáne arnaıy orta oqý oryndaryndaǵy bilim sapasyn arttyrý jumystary kúsheıtilmek. Berdibek Saparbaev oblystyń 500 shaqyrymdyq avtokólik jolynyń sapaly jóndelýin qamtamasyz etý, kommýnaldy qyzmetter tarıfiniń, birinshi qajettiliktegi azyq-túlikter men dári-dármekter baǵasynyń negizsiz ósýine jol bermeý máseleleri qatań baqylaýda bolý kerektigin atap ótti.
Oblys ákimi: «Halyqty tolǵandyratyn suraqtardyń biri – medısınalyq qyzmetterdiń sapalylyǵy men qol jetimdiligi. Densaýlyq saqtaý basqarmasy bul ispen tyǵyz aınalysýy kerek. Bizder, óz tarapymyzdan bıyl jedel járdem qyzmetin avtomobıldermen qamtamasyz etý suraǵyn sheshý arqyly qoldaý kórsetetin bolamyz»,- dep jetkizdi.
Qoǵamdyq qaýipsizdikti qamtamasyz etý maqsatynda quqyq qorǵaý organdaryna quqyqbuzýshylyqtyń, ásirese kámeletke tolmaǵandar arasyndaǵy quqyqbuzýshylyqtyń aldyn alý jáne eskertý jumysyn kúsheıtý tapsyryldy. Dál osy maqsatta aǵymdaǵy jyldyń naýryz aıynda ózin oń jaǵynan kórsetken "Halyq qaýipsizdigin qamtamasyz etý" jobasy jańǵyrtylady.
«Elbasy qoıǵan mindetterdiń sapaly júzege asyrylýy bizge álemniń damyǵan otyz eli qataryna enýge múmkindik beredi. Men sizderdiń árqaısysyńyzdan solardy oryndaýda erekshe jaýapkershilikpen qaraýlaryńyzdy suraımyn», - dedi jıyndy túıindegen Berdibek Saparbaev.
Temir QUSAIYN,
Aqtóbe oblysy
