Qarjy • 06 Aqpan, 2019

Halyq salymdarynyń kólemi 8,4 trln teńgeni qurady

Qazaqstandyq depozıtterge kepildik berý qorynyń derekteri boıynsha, 2018 jyly III toqsanda ujymdyq saqtandyrý júıesine qatysýshy bankterdegi halyq salymdarynyń kólemi 8,4 trln teńgeni qurady.

Marzhan Tileubekova

Bólshek depozıtterdiń jalpy kólemi 86,1% nemese 7,3 trln teńge merzimdi salymdarǵa deıin tústi. Kart-shottardaǵy qarajat qaldyqtary 10,6% nemese 895,7 mlrd teńgeni quraıdy. Shartty salymdar 3,1% nemese 259,5 mlrd teńgege tústi. Al talap etilgenge deıingi salymdar 0,2% nemese 19,7 mlrd teńge boldy.

Ornalastyrylǵan qarajat kólemi boıynsha salymdardyń eń joǵary úles salmaǵy 5 mln teńgege deıin — 26,4% (1,9 trln teńge), ekinshi orynda 500 mln teńgeden astam salymdar — 24,7% (1,8 trln teńge), úshinshi orynda — 50-den 500 mln teńgege deıin 19,2% (1,4 trln teńge).

Depozıtterge mindetti kepildik berý júıesiniń negizgi maqsaty – qarjy júıesiniń turaqtylyǵyn qamtamasyz etý, sonyń ishinde depozıtterge mindetti kepildik berý júıesine qatysýshy bank májbúrlep taratylǵan jaǵdaıda depozıtorlarǵa kepildik berilgen ótemdi tóleý arqyly bank júıesine degen senimdi qoldaý. Ol úshin konkýrstyq negizde salymshylar úshin arnaıy bank-agenti tańdalady.

Qordyń mindetterine qarjy júıesiniń turaqtylyǵyn qamtamasyz etýge qatysý, qatysýshy bank májbúrlep taratylǵan jaǵdaıda kepildik berilgen depozıtter depozıtorlarynyń quqyqtary men zańdy múddelerin qorǵaý kiredi. Atalǵan Qor Qazaqstan Respýblıkasynyń Ulttyq Bankine qyzmet kórsetedi. Sondaı-aq bank júıesine senimdi qoldaý boıynsha máselelerdi shuǵyl sheshýge kómektesedi.

Qordyń qyzmeti eldegi ekinshi deńgeıli bankterdegi halyq jınaqtarynyń ósýine jáne eldiń bank sektoryndaǵy ótimdiliginiń jalpy deńgeıiniń artýyna da yqpal etedi. Sondaı-aq memlekettiń qarjy sektoryn 2030 jylǵa deıin damytý tujyrymdamasy sheńberinde qorǵa bankterdiń qarjylyq dármensizdigin joıý jáne retteý boıynsha, onyń ishinde depozıtterge mindetti kepildik berý salasyndaǵy zańnamany jetildirý arqyly birqatar jańa fýnksııalar men ókilettikterdi berý josparlanǵan.

Esterińizge sala keteıik, 2018 jyly Qazaq Banki, Astana Banki jáne Eksımbank banktik jáne ózge operasııalardy júrgizýge lısenzııasynan aıyryldy. Bank VTB (Qazaq Banki), Eýrazııalyq Bank (Astana Banki) jáne «Qazpochta» AQ (Eksımbank) ótemdi tóleý agent-bankteri boldy.

Bank VTB salymshylarǵa 19,2 mlrd teńge tóledi, 2019 jyldyń 31 qańtaryna kepildik berilgen ótemniń qaldyǵy 1,2 mlrd teńgeni qurady.

Eýrazııalyq Bank 30,7 mlrd teńge tóledi,qaldyq — 6,8 mlrd teńge.

«Qazpochta» aǵymdaǵy jyldyń 4 aqpanynan tólemdi bastady, kepildik berilgen ótemniń qaldyǵy 258,3 mln teńgeni quraıdy.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz