Qazaqstan da bul ǵalamdyq úderisten tys qalmaýy tıis. Búginde osy maqsatty kózdeıtin «Sıfrly Qazaqstan» baǵdarlamasy el turmysyna dendeı enip keledi. Negizi bul baǵdarlama aıasynda el boıynsha ınternet qoldanýshylar sanyn 80 prosentke jetkizý mindeti tur. 2020 jylǵa deıin osy mejeni ıgerýimiz kerek. Al eldiń aqparat salasyndaǵy sıfrly habar taratý úrdisi 95 prosentke jetýi tıis. Sondaı-aq, aldaǵy bir-eki jyldyń júzinde turǵyndardyń ǵalamtordy ıgerý saýattylyǵy da 80 prosentten asýy kerek. Munyń bári Memleket Basshysy Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýy jáne «Bolashaqqa baǵdar: rýhanı jańǵyrý» atty baǵdarlamalyq maqalasynda da naqty aıtylǵan.
«Sıfrly Qazaqstan» baǵdarlamasynyń aımaqtarda júzege asýy adamdardyń qolaıly ómir súrýine bastaıtyn úrdis ekenin qaıtalap jatý da artyq. Bul jerdegi jetistik qoǵamdy qaǵazbastylyqtan aryltyp, bıýrokratııany joıýǵa deıin jetkizýi tıis. Al sıfrlandyrýdyń eń basty ereksheligi dep barlyq salaǵa batpandap enip ketken sybaılas jemqorlyqtyń jolyn kesýge múmkindik beretin jaqtaryn aıtýymyz kerek.
Bul baǵyttaǵy jumystar Almaty oblysynda óz deńgeıinde júrgizilip jatyr deýge naqty negiz bar. Qazir aımaqta «Sıfrly Qazaqstan» baǵdarlamasy aıasynda jumystar ár sala boıynsha júrýde. Mysalǵa, ótken jyly bilim berý salasynda bul qadam sátti júzege asty. Oblys boıynsha balabaqsha kezegine ótinish berýge avtomattandyrý júıesi engizildi. Bul júıege aımaqtaǵymektepke deıingi 951 uıym tirkeldi. Osy balabaqsha kezegine qatysty sıfrlandyrý jumysy 81,4 prosentke jetken eken. Munan bólek, oblysta «Smart-kolledj» pılottyq jobasy iske qosyldy. Bul óńirdegi kolledjderde bilim berý prosesin avtomattandyrýǵa múmkindik beredi. Al mektepterdiń kompıýter tehnıkasymen jabdyqtalýy 100 prosent oryndalyp, sıfrly kabınetterdiń sany 11275 bólmege jetti. Bilim berý nysandaryn jyldamdyǵy joǵary ınternetpen qamtý 56 prosentke artqa neken.
Oblysta «Jetisý» medısınalyq aqparattyq júıesi qoldanysqa engizilip jatyr. Bul boıynsha densaýlyq saqtaý salasyndaǵy barlyq uıymdar medısınalyq aqparat júıesine 100 prosentke qosylǵan eken. Onyń ishinde aýdandyq deńgeıdegi qamtý 69,9 prosentti qurapty. Jalpy, densaýlyq saqtaý salasynda elektrondy formatqa 117 medısınalyq nysan kóshken. Qazir qaǵazsyz qujat aınalymy 53 prosentke deıin kóbeıdi. Esep boıynsha óńir turǵyndarynyń 83 prosentinde elektrondy jensaýlyq pasporty bar. Jaqynda Taldyqorǵan qalasynyń jedel járdem stansııasya «Kómek 103» sıfrly júıesine tolyqtaı qosyldy. Bul naýqastardyń shaqyrýyn jedel qabyldap, dárgirelik kómekti ýaqtyly kórsetýge jol ashty.
Byltyr turǵyn úı-kommýnaldyq sharýashylyq salasynda 9 turǵyn úı «e-Shańyraq» biryńǵaı zııatkerlik aqparattyq júıesine qosylǵan eken. Ntáıjesinde tutynylǵan jáne jetkiziletin kommýnaldyq qyzmetterdi baqylaý jáne monıtorıng boıynsha shyǵyndar 30 prosentke tómendedi. Jalpy, sıfrlandyrý baǵdarlamasynyń «Qalany basqarý» baǵytyn iske asyrý aıasynda «Smart Taldykorgan» mobıldi qosymshasy ázirlengen. Ol boıynsha qyryqtan astam qalalyq servıs qyzmetine ınternet arqyly qosylýǵa múmkindik beredi. Oblys ortalyǵynda «Aqyldy jaıaý júrginshi ótkeli» iske qosylǵan. Birneshe «Smart» aıaldama kesheni ornatyldy.
Sondaı-aq, Almaty oblysynyń quqyq qorǵaý salsy da sıfrly qyzmet kórsetýge kóship jatyr. Mysalǵa, «Elektrondyq qylmystyq is» jobasy sheńberinde qylmystyq isterdi tergeý elektrondy formatta júrgizilýde. Bul maqsatta 300 arnaıy jumys orny ashylǵan. Nátıjesinde tergeý júrgizý merzimi qysqaryp, is materıaldaryn burmalaý táýekeli azaıǵan.
- «Sıfrly Qazaqstan» baǵdarlamasy aıasynda sıfrlandyrý úderisi barlyq ómir súrý salasyna qatysty jáne memleketimizdiń árbir turǵynynyń ómir súrý deńgeıin arttyrýǵa baǵyttalǵan. Bul baǵyttaǵy jumystyń bir parasyn «Jetisý – adaldyq alańy» jobalyq keńsine qatysty aıtýǵa bolady. Jobalyq keńse ashylǵaly beri jumys toby 12 otyrys ótkizdi. Al jaqynda ǵana biz Almaty oblysyndaǵy memlekettik qyzmet kórsetýdi sıfrlandyrý boıynsha eki máseleni talqyladyq. Birinshisi, Memlekettik kirister departamenti bastamashy bolyp otyrǵan «Memlekettik qyzmetti jedel kórsetý – dóńgelekti keńse» jobasy. Bul boıynsha salyq mindettemelerin eseptep, qabyldaý úshin eldi mekenderge arnaıy jabdyqtalǵan kólik shyǵarý josparlanǵan. Onyń qyzmeti tolyqtaı sıfrlanady. Nátıjesinde, salyq tóleýshilerdiń jumysy jeńildep, qaǵazbastylyq azaıady. Ekinshi jobany «BilimMediaGroup» kompanııasy usynyp otyr. Ol bilim salasyndaǵy qyzmetterdi avtomattandyrý arqyly sybaılas jemqorlyq qaýipin tómendetýge baǵyttalǵan, - deıdi Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń basshysy Serikbaı Nurǵısaev.
Qalmahanbet MUQAMETQALI,
«Egemen Qazaqstan»
Almaty oblysy
