Bul elimiz boıynsha densaýlyq saqtaý salasynda salynǵan barlyq medısınalyq mekemelerdiń 40 paıyzyn quraıdy. Alǵashqy medısınalyq-sanıtarlyq kómek nysandaryn salý kezinde quny 30 mln. teńge bolatyn qurama modýldik qurylymdar paıdalanyldy. Tıisinshe, bul shyǵyndy 2 esege qysqartady. Túrkistan oblysy elimiz boıynsha alǵashqy bolyp modýldik medısınalyq beketterdiń qurylysyn qolǵa aldy. Nemis tehnologııasy boıynsha salynyp, Túrkııada jasalǵan ǵımarattardyń artyqshylyǵy alýan. Bul jańashyldyq ýaqyt pen bıýdjet qarajatyn aıtarlyqtaı únemdeıdi. Eń bastysy óńirdegi shalǵaı aýyldardyń turǵyndary úshin medısınalyq kómek kórsetý máselesi sheshildi. Medpýnkttiń modýldik qurylymyn qurastyrýǵa nebári 2 aı ǵana ýaqyt ketedi. Jańa medpýnkterde feldsher jáne medbıkeler medısınalyq kómek kórsetedi. Ol úshin munda barlyq jaǵdaı jasalǵan. Sapaly materıaldardan salynǵan jaıly ǵımaratta táýligine ondaǵan naýqastardy qabyldaýǵa múmkindik beredi.
Sondaı-aq, elimizde 2018-2025 jyldarǵa arnalǵan Densaýlyq saqtaý ınfraqurylymyn damytýdyń 17 óńirlik mańyzdy josparlar bekitilip iske asyrylýda. Bul jobaǵa sáıkes, 1231 alǵashqy medısınalyq-sanıtarlyq kómek kórsetý nysandarynyń qurylysy qarastyrylǵan, olardyń 327-i Túrkistan oblysynda salynatyn bolady.
Qazirgi ýaqytta Túrkistan oblysynda 6 jańa emhana qurylysy júrgizilýde. Atap aıtqanda, Atakent, Myrzakent, Aqsýkent jáne Kentaý, Jetisaı, Shardara qalalarynda. Memlekettik-jekemenshik áriptestik aıasynda Túrkistan qalalyq emhanasynyń, 610 tósektik oblystyq kópsalaly aýrýhananyń, Oblystyq týberkýlezge qarsy dıspanserdiń, Oblystyq onkologııalyq dıspanserdiń qurylysyn júrgizý jáne Túrkistan qalasyndaǵy oblystyq jedel medısınalyq kómek stansııasyn qaıta qurý jáne paıdalanýǵa berý josparlanýda.
