Japonııaǵa attanǵan Qazaqstan komandasynyń qatarynda Dmıtrıı Reıherd joq. Ol jaraqatynyń syr berýine baılanysty Park-Sıtıdegi álem chempıonatynan da syrt qalǵan bolatyn.
Japonııaǵa Reıherdtiń ornyna jas sportshy Oleg Sınn attandy. Jas mogýlshylar úshin Tazakavodaǵy doda Krasnoıarskide bastalatyn Ýnıversıada aldyndaǵy qyzý daıyndyq bolmaq.
«Komandada Reıherdten basqa ózgeris joq ekenin baıqaǵan bolarsyzdar. Onyń ornyna Oleg Sınn qatysady. Dmıtrıı álem kýboginiń jalpy esebinde 5-shi orynda kele jatqan. Biraq qazir bul mańyzdy emes. Biz onyń tezirek qatarǵa qosylyp, ortamyzǵa oralǵanyn tileımiz. Reıherd Almatyda ótetin álem kýboginiń fınaldyq kezeńine qatysady degen úmitimiz mol. Maýsym aıaqtalar tusta jas sportshylarǵa kóp múmkindik beriledi. Erteń olardyń áýselesin baıqaıtyn bolamyz», - deıdi komandanyń bas bapkeri Elena Krýglyhına.
Qazaqstan komandasynyń tolyq quramy tómendegideı:
Áıelder: Iýlııa Galysheva, Aıaýlym Ámrenova.
Erler: Pavel Kolmakov, Sergeı Romanov, Aleksandr Gebert, Oleg Sınn.
Jarys astana ýaqytymen saǵat 10.30-da bastalady.
