Semeıde el gazeti «Egemen Qazaqstan» gazetiniń 100 jyldyq mereıtoıy jalǵasýda. Bir kezderi Qanysh Sátpaev, Sháken Aımanov sııaqty qazaqtyń aıtýly tulǵalary bilim alǵan Muhtar Áýezov atyndaǵy pedagogıkalyq kolledjde Úrjar aýdanynyń týmasy, alashordashy,túrkolog, fılologııa ǵylymdarynyń doktory Emır Nádjıptiń 120 jyldyǵyna arnalǵan kesh ótti.
Is-sharaǵa «Egemen Qazaqstan» gazetiniń basqarma tóraǵasy Darhan Qydyráli, alashtanýshy Tursyn Jurtbaı, tarıhshy ǵalym Muhtarbek Kárimov, aqyn Tynyshtyqbek Ábdikákim jáne kolledj dırektory Shaǵangúl Janaeva qatysty. Jıynǵa Emır Nádjıptiń qyzy Elmıra Emırqyzy da keldi.
Emır Nádjıp Maqanshy aýdany, Baqyt aýylynda dúnıege kelgen. Shyǵystanýshy ǵalym – osy oqý ornynyń túlegi.
Is-shara barysynda Emır Nádjıptiń saǵynyshy týǵan jeri-qazaq eli bolǵandyǵy týraly estelikter aıtyldy. Sondaı-aq ǵalymnyń qyzy Elmıra Emırqyzy ákesiniń adamgershiligi men ultjandylyǵy týraly sóz qozǵady.
Jıynda Emır Nádjıptiń Muhtar Áýezovpen birge osy oqý ornynda oqyǵandyǵy jáne Semeıde «Iаrysh» fýtbol komandasynda birge oınaǵandyǵy týraly aıtyldy.
Kesh sońynda Emır Nádjıptiń ǵylymı taǵylym týraly kitaptarynyń tusaýy kesildi.
Raýshan Nuǵmanbekova,
Semeı
«Egemen Qazaqstan»
