Osy máseleni retteý úshin óńirde arnaıy jumyldyrýshy toptar quryldy. Onyń músheleri turmysy tómen, tabysy az, turaqty baspana máselesi sheshimin tappaǵan otbasylardyń úılerine baryp, jaı-kúılerimen tanysýdy turaqty iske aınaldyryp keledi. Onyń quramynda qoǵam qaıratkerleri, máslıhat depýtattary, kásipkerler, qoǵamdyq qorlar men memlekettik organdardyń ókilderi bar.
Sondaı-aq bul quramǵa aımaqtaǵy abyroıy joǵary, ómirden kórgeni men túıgeni mol zeınet jasyndaǵy adamdar da endi. Solardyń biri, prokýratýra organdarynyń ardageri Márııa Tájibaeva muqtaj jandarǵa kómek kórsetý isiniń bel ortasynda júr. «Men zeınettemin. Áıtse de top quramynda el-jurtqa qolymnan kelgen kómegimdi tıgizýdi qajet dep taptym. Sonda baıqaǵanym, birqatar otbasylar men muqtaj jandar ózderiniń zańdy quqyqtaryn bile bermeıdi. Olarǵa osy turǵydan zańdyq keńes berýdi paryzym dep sanaımyn. Tutastaı alǵanda qarapaıym turǵyndar jergilikti bıliktiń ózderin eleýsiz qaldyrmaǵany úshin rızashylyqtaryn bildirýde» deıdi ol.
– Jumyldyrýshy jumys toptary turmys deńgeıleri tómen otbasylardyń jaı-kúıimen tanysqannan keıin tıisti sheshim qabyldaıdy. Qajet jaǵdaıda olarǵa ártúrli materıaldyq kómek berý sharalaryn uıymdastyrady. Bul másele jumyldyrýshy toptar músheleriniń qatysýymen qalalyq ákimdik janynda turmysy tómen otbasylarǵa kómek kórsetý jóninde qurylǵan shtabtyń májilisinde talqylanyp, túbegeıli sheshimin tabady, − dedi Aqtóbe qalasynyń ákimi Ilııas Ispanov.
О́ńirde derbes baspanasy joq, páter jaldap turatyn kóp balaly analarǵa bıznes ókilderi men kásipkerler kómek kórsetýde. Mysaly, taıaýda «AqtóbeStroıEkspert» JShS-nyń dırektory Jastalap Janbeýov qurqyltaıdyń uıasyndaı tar, ýaqytsha baspanada turatyn segiz balanyń anasy, «Altyn alqa» ıegeri Saltanat Sádýovaǵa páter satyp alyp berdi. Bul úshin ol «Qolqanat Aqtóbe» qoǵamdyq qoryna qajetti qarajatty aýdardy. Osy arada kóp balaly ananyń eri, ekinshi toptaǵy múgedek ári eki perzenti arnaıy mektepte oqıtyn múgedek balalar ekenin de aıta ketken jón.
Sondaı-aq Aqtóbe qalasynda jaldamaly páterde turatyn alty balanyń anasy Galına Novıkovaǵa jer teliminiń sertıfıkaty berildi. Endigi kezekte Aqtóbeniń atymtaı jomarttarynyń biri, jeke kásipker Aıbek Ámirbaev berilgen jer telimine oǵan úı salyp berýdi kózdep otyr. Aımaqta turmysy tómen kóp balaly otbasylarǵa áleýmettik kómek kórsetý isiniń ózge de mysaldary jetkilikti. Jumyldyrýshy toptar men Aqtóbe qalalyq ákimdigi janynan qurylǵan shtab músheleri alǵa qoıǵan maqsattaryn iske asyrý úshin naqty meken-jaılarǵa baryp, qarapaıym turǵyndardyń ótinishterine qulaq túrip júr.
Temir QUSAIYN,
«Egemen Qazaqstan»
AQTО́BE
