Ulttyq baıandamany «Jastar» ǵylymı-zertteý ortalyǵy áleýmettik zertteýler, resmı statıstıkalyq málimetter, jastardyń bilim jáne ǵylym, densaýlyq saqtaý, jumyspen qamtylý, kásipkerlik jáne t.b. salalardaǵy jaǵdaılardy taldaý negizinde ázirlegen.
− «Qazaqstan jastary-2018» ulttyq baıandamasy memlekettik organdarǵa, jastar saıasaty ınstıtýttaryna, bilim berý mekemelerine, jastar uıymdaryna, buqaralyq aqparat quraldaryna, jastar saıasatyn júzege asyrý men jastardy qoldaý jumysy mańyzdy bolyp tabylatyn barlyq tulǵalarǵa arnalǵan, – dedi Qoǵamdyq damý mınıstrligi Jastar jáne otbasy isteri komıteti tóraǵasynyń mindetin atqarýshy Ashat Oralov.
Aldaǵy ýaqytta «Qazaqstan jastary-2018» ulttyq baıandamasynyń málimetteri jastardyń damýyna jaǵdaı jasaýǵa baǵyttalǵan tıimdi basqarýshylyq sheshimder qabyldaý maqsatynda qoldanylady. Baıandama 8 bólimnen turady: jastardyń demografııalyq sıpattamasy, jastar saıasatyn iske asyrýdaǵy halyqaralyq tájirıbe, óskeleń urpaqtyń densaýlyǵy jáne bos ýaqyty, jastardyń ómirindegi bilim jáne ǵylym, áleýmettik-ekonomıkalyq jaǵdaıy, qoǵamdyq-saıası úrdisterdegi belsendiligi, moraldyq-adamgershilik jáne qundylyqtyq ustanymdary jáne jastar ortasyndaǵy qylmys.
Sonymen qatar ulttyq baıandamada tuńǵysh ret elimizdiń Jastar progresiniń ındeksindegi orny týraly jazylǵan.
– Ortalyq qurylǵaly beri ótken bes jyldyń ishinde jastar ortasyndaǵy jaǵdaıdy – jastar arasyndaǵy dinı jaǵdaıdy, qundylyqty baǵyttar men nusqaýlardy, volonterlik qyzmetin, kóshi-qon kóńil-kúılerin, jastardyń kásibı baǵyttaryn, áleýmettik ahýaldy jáne jastardyń, sonyń ishinde áleýmettik turǵyda álsiz, aýyldyq jastardyń, monoqalalar jastarynyń áleýmettik tájirıbelerin dıagnostıkalaýǵa jáne monıtorıngiden ótkizýge baǵyttalǵan 20-dan astam keshendi áleýmettik zertteýler júrgizildi, – dedi «Jastar» ǵylymı zertteý ortalyǵy» JShS dırektory Talǵat Qalıev.
Al ortalyq dırektorynyń orynbasary Ásem Qaıdarova ótken jyldyń IV toqsanynda eńbek naryǵyndaǵy 15-28 jastaǵy jumys kúshi 2157, 7 myń adamdy quraǵandyǵyn, onyń ishinde jumys isteıtin turǵyndardyń sany 2079,2 myń adamǵa jetkendigin atap ótti.
– О́zin-ózi jumyspen qamtyǵandar 23,7 paıyzdy quraıdy, al jaldamaly jumysshylar sanynyń kórsetkishi – 76,3 paıyz. Sonymen qatar IV toqsanynda NEET sanatyndaǵy jastardyń úlesi tómendedi, ıaǵnı 7 paıyzdy qurady, – dedi Á.Qaıdarova.
Serik ÁBDIBEK,
«Egemen Qazaqstan»
