Búgingi tańda erli-zaıyptylardyń arasynda túrli máseleler týyndap, onyń sońy otbasylyq shyrǵalańǵa ulasyp jatady. Mundaı jaǵdaı, ásirese jastardyń arasynda kóp kezdesedi. Orynsyz qyzǵanysh, beımálim kúdik te erli-zaıyptylardyń arasyna ot jaǵyp, aqyrynda opyq jegizetini shyn. Elen Álimjan «Áıelder bir is bastady» dramasynda osyndaı áreketterdi áshkerelep, kórermendi kúldire otyryp oılanýǵa jeteleýdi maqsat etken. Shyǵarmada kúıeýlerin bir-birine ózara jamandap, olardan kúdiktenip, aqyry ony tuzaqqa túsirýdi kóksegen áıelderdiń beınesi de ashyq berilgen. Jalpy, baılyqtyń býyna mastaný, sol arqyly jaýapkershilik sezinbesten oınap-kúlýdi maqsat etken keıbir qoǵamdaǵy erkekterdiń de prototıpi osy dramada bar.
«Árıne «Áıelder bir is bastady» komedııasy – ol meniń shyndyqty berý tásilim. Otbasyndaǵy, qoǵamdaǵy shyndyqty halyqty kúldire otyryp jetkizip, sodan soń oılandyrý. Bul shyǵarmany osyndaı maqsatpen jazdym», deıdi dramatýrg Elen Álimjan.
Bir qaraǵanda, qoıylym kóńildi kórinisterge qurylǵan. О́zara kóńil kóterip otyrǵan Eńlikgúl, Gúlbıbi jáne Aıajan degen úsh kelinshek er-azamattarynyń adaldyǵyna kóz jetkizbek bolyp, túrli qýlyqtarǵa barady. Biraq osy bir kórinistiń ózi búgingi qoǵamda, árbir otbasynda kezdesip jatatyny belgili. Al sahnadaǵy úsh kelinshektiń beınesin somdaǵan Gaýhar Sultanbekova, Indıra Mustafaeva jáne Nazym Aqylova ózderine tıesili róldi laıyqty meńgergenin kórsetse, Jasulan Qambatyrov ózi somdaǵan beınesi arqyly árbir azamattyń óz otbasyna tıisti kóńil bólýi kerektigin uǵyndyrady. Bul turǵyda oblystyq qazaq drama teatrynyń shyǵarmashylyq ujymy osy qoıylym arqyly ómirdegi otbasy qundylyǵyn alǵa shyǵarǵan. Komedııanyń qoıýshy-rejısseri – Qazaqstannyń eńbek sińirgen qaıratkeri Nurlan Jumanııazov, al qoıýshy-sýretshisi Áıgerim Ramazan.
Hamıt ESAMAN,
«Egemen Qazaqstan»
Jambyl oblysy
