«Urlyqty ashqannan góri aldyn alǵan ońaı» degen ustanymdy basty maqsat etken krımınaldyq polısııanyń jedel ýákilderi ákimdiktiń, veterınarlyq basqarmanyń ókilderimen birlesip, Jambyl aýdanynda turǵyndarmen kezdesýler ótkizdi. Jıyndarda erkin jaıylymda júrgen maldyń urlanýyna, olardy tanýǵa qatysty suraqtar kóterilip, veterınarlyq qujattardy berý tártibi túsindirildi. Kazanka aýyldyq okrýginde ornalasqan «Shatılo ı K» JShS-niń oń tájirıbesi mysalǵa keltirildi. Munda úsh jyldan beri «Elektrondy baqtashy» júıesi tıimdi qoldanyp keledi. 1200 basqa arnalǵan jaıylym tómenjıilikti kerneýli symmen aınala qorshalǵan. Ishtegi ashatuıaqtylar eki malshynyń baqylaýynda. Nátıjesinde iri qara ashyq aspan astynda qajetti azyqpen qorektenip, aınalaǵa jaıylmaıdy. Bul óz kezeginde urlyqtyń yqtımaldyǵyn anaǵurlym azaıtyp otyr. Mal urlyǵyn eńserýdegi amaldardyń biri – janýarlardy tańbalaý. Búginde Jambyl aýdanynda 75 myń bas mal tańbalanǵan.
Operasııa barysynda mal urlyǵynyń aldyn alýdan bólek, polısııa qyzmetkerleri qylmystardy anyqtaý jumystaryna da aıryqsha kóńil bólgen. Krımınaldyq polısııa basqarmasynyń bastyǵy, polısııa polkovnıgi Petr Klımovtyń aıtýynsha, 40 mobıldik top qurylyp, 43 beket qoıylǵan. Mal men et ónimderin tasymaldaıtyn avtokólikter, bazarlar men belgilenbegen saýda oryndary júıeli túrde tekseriledi. 13 bas mal ıelerine qaıtaryldy. 13 qylmystyq áreket áshkerelendi. Buryn isti bolǵan 40 adamnyń mal urlyǵyna qatystylyǵy tekserildi. Mal men et ónimderin tıisti qujattarsyz tasymaldaýdyń birneshe faktisi anyqtaldy.
О́mir ESQALI,
«Egemen Qazaqstan»
Soltústik Qazaqstan oblysy
