Densaýlyq saqtaý mınıstrligi, Pedıatrııa jáne balalar hırýrgııasy ǵylymı ortalyǵy, «Pedıatrlar Odaǵy» qoǵamdyq birlestigi men S.Asfendııarov atyndaǵy QazUMÝ-dyń balalar aýrýlary kafedrasynyń uıymdastyrýymen ótetin jıyrǵa Reseı, О́zbekstan, Qyrǵyz jáne óz elimizdiń 100-den astam zertteý jumysymen aınalysatyn jas pedıatrlar men balalar hırýrg-dárigerleri qatysady.
Halyqaralyq deńgeıdegi konferensııada balalary aýrýlaryn emdeý men dıagnostıkalaýdyń zamanaýı ádisteri, medısınalyq kómek berýdi uıymdastyrý aspektileri, sırek aýrýlardy emdeý men dıagnostıkalaýdy jetildirý, túrli hırýrgııalyq jáne somatıkalyq patologııalary bar balalardy ońaltý, psıhologııalyq jáne medısınalyq-áleýmettik beıimdeý, balalar jasyndaǵy ıntensıvti terapııa men anestezıologııa, dıagnostıkalaý men emdeý barysynda qoldanylatyn zamanaýı medısınalyq tehnologııalar máseleleri talqylanyp, ǵylymı jobalar usynylatyn bolady.
Konferensııanyń ashylý saltanatynda QR Densaýlyq saqtaý mınıstrliginiń ókilderi, elimizdiń jetekshi medısınalyq joǵary oqý oryndarynyń rektorlary, medısına salasyna eńbek sińirgen qaıratkerler jas ǵalymdar aldynda alǵy sóz sóıleıdi.
Konferensııa – jas ǵalymdardyń ǵylymı áleýetin arttyrý, pedıatrııa jáne balalar hırýrgııasy salasyndaǵy ózekti máselelerdi kóterý, damýy men keleshegin saralaý, jas mamandardy ǵylymmen aınalysýǵa shaqyrý, densaýlyq salasyndaǵy memlekettik baǵdarlamalardy iske asyrýda jas dárigerlerdiń rólin arttyrýdy kózdeıdi.
Sondaı-aq ǵylymı konferensııaǵa usynylǵan baıandamalar úsh atalym boıynsha anyqtalyp, marapattalady:
1. «Úzdik baıandama» (3-oryn);
2. «Úzdik maqala» (3-oryn);
3. «Úzdik posterlik baıandama» (3-oryn).
Konferensııa materıaldary «Pedıatrııa jáne bala hırýrgııasy» ǵylymı jýrnalynda jarııalanatyn bolady.
Aınash ESALI,
«Egemen Qazaqstan»
ALMATY
