Atalmysh baıqaýǵa elimizdegi qorshaǵan ortany jaqsartý boıysha 143 ıdeıa kelip tústi. Jas qazaqstandyqtar aǵyndy sýlardy tazartý quraldarynyń ázirlemelerin, qaıta óńdelgen plastık pen polıetılen paketterden ár túrli buıym óndirýdi, qoqysty suryptaýdy, bıosómkelerdi, jasyl tehnologııalardy, eko-keıterıng pen basqa da sony ıdeıalardy usynyp otyr.
Baıqaýdyń jartylaı fınalynda on jobanyń avtory ıdeıalaryn tanystyrdy. Ekologııa salasyndaǵy sarapshylar quramyndaǵy qazylar alqasy 7 úzdik ázirlemeni tańdady. 15 naýryzda Astanada olar 3 mln teńgeni quraıtyn grant úshin kúresetin bolady.
Pavlodarlyq stýdent Uljan Baıbekova eski bannerlerden sómke óndirýdi retke keltirgisi keledi. Boıjetkenniń aıtýynsha, ol dostarymen birge birneshe uıymmen kelisip, olardan qajetsiz banerlerin alatyn bolady. Bul materıaldyń ydyraýyna myń jyl qajet. Janǵan kezde óte zııandy gaz bóledi.
«Men matematık mamandyǵyn ıgerýdemin. Biraq, meni jáne meniń dostarymdy ekologııa taqyryby alańdatady. О́tken jyldyń kúzinde Startup Weekend qatysqan kezimizde 300 myń teńge grantqa ıe boldyq. Bul aqsha jobamyzǵa dızaıner men kásibı tiginshi shaqyrýǵa múmkindik berdi. Bannerlerden sómke ǵana emes, qalamsaýyttar, kosmetıkaǵa arnalǵan saýyttar, klatchtar, shabadandarǵa arnalǵan qaptar tigýge bolady. Mundaı ónim shetelde, mysaly, Amerıkada jáne tipti kórshiles Reseıde úlken suranysqa ıe. Bul elderde osyndaı dızaınerlik zattardyń quny joǵary. Búginde búkil álemde adamdardyń qorshaǵan ortaǵa kózqarasy ózgerdi. Sondyqtan kópshilik ekologııalyq materıaldardy tańdaıdy. Bannerler óte myqty, biraq aıazǵa tózimsiz», – deıdi Uljan Baıbekova.
«Dostarymyzben birge plastıkalyq bótelkelerden otyrǵysh óndirýdi bastadyq. Birneshe meıramhanamen kelistik: biz olardyń qoqysyn shyǵaramyz, al olar bótelkelerin jeke jınaıtyn bolady. Bótelkelerdi qurastyryp, qańqasyn quraımyz da matamen qaptaımyz. Endi bizdiń ónim beriktigi jaǵynan dúken óniminen kem túspeıdi, ári bul rette óte yńǵaıly bolyp tabylady, deıdi «3.2.1. Start!» baıqaýyna óz jobasymen qosylǵan qaraǵandylyq ıntern hırýrg Tımýr Korobeınıkov.
Baıqaýdy uıymdastyrýshylardyń biri Alıma Isembaevanyń aıtýynsha, baıqaýǵa qatysýǵa nıet bildirgenderdiń kóp bolýy qazaqstandyq jastardyń óte belsendi jáne ekologııa problemalary jaıly oılanatyndaryn bildiredi.
«Ádette jastarda ıdeıalary da jiger de kóp. Alaıda, olardy iske asyrý úshin qarajaty men tájirıbesi jetkiliksiz bolady. «3.2.1. Start!» baıqaýy qatysýshylarǵa armandaryn júzege asyrýǵa kómektesýge arnalǵan. «3.2.1. Start!» baıqaýynda jartylaı fınalǵa barlyq qatysýshylar jobalardy qurý jáne ilgeri jyldytý boıynsha eki kúndik tegin oqytýdan ótedi. Bizde grantty utyp almasa da, bilim alyp, óz isin bastap ketken ótken jyldardyń qatysýshylary bar», – deıdi Alıma Isembaeva.
Aınash ESALI,
«Egemen Qazaqstan»
ALMATY
