Elshi ataǵyn bergen arnaıy sertıfıkatty «Kazakh Tourism» ulttyq kompanııasy AQ-nyń basqarma tóraǵasy Rashıd Kúzembaev tabys etti.
«Qazaqstannyń týrızm elshileri baǵdarlamasyn biz ótken jyly bastaǵan bolatynbyz. Ondaǵy maqsat - elimizge jáne shetelge tanymal tulǵalar arqyly otandyq týrızmdi nasıhattaý men onyń damýyna úles qosý. Bıyl jastar jylyna oraı biz elshiler qataryn jas boksshy, elimizdiń týyn dúnıejúzine abyroımen kóterip júrgen Sadrıddın Ahmedovpen tolyqtyrýdy jón kórdik. Sondaı-aq, elshilik sertıfıkatyn tabys etý rásimin arnaıy «Beibarys» demalys bazasynda ótkizýimiz kezdeısoq emes. Sebebi, bul jerde demalystan bólek, sportpen shuǵyldanýǵa barlyq jaǵdaı jasalǵan», - dedi ol.
Ulttyq kompanııa basshysynyń aıtýynsha, ústimizdegi jyly elshilerdiń qatysýymen ishki týrızmdi ilgeriletýge arnalǵan birqatar jobalardy júzege asyrý josparda bar.
«Men úshin bul kútpegen jańalyq jáne úlken jaýapkershilik. Endigi ýaqytta men sportpen qatar elimizdiń týrızm salasynyń odan ári damyp, jaqsarýyna jaýaptymyn. Boksshy retindegi basty maqsatym kók týymyzdy bıik ustap júrý bolsa, elshi retindegi maqsatym Qazaqstan týrızmin damytýǵa sál de bolsa óz úlesimdi qosý», - dedi Sadrıddın Ahmedov. Sonymen qatar, tanymal sportshy óziniń demalysyn qaıda ótkizetini týraly da aıtyp ótti.
«Jekpe-jek ótkizer kezde jáne oǵan daıyndyq barysynda kóbinese shetelde bolamyn. Sondyqtan elge jetkenshe asyǵamyn, ıaǵnı óz elimde demalǵandy jón sanaımyn. Aıtar bolsam, jýyrda ǵana dostarymmen Býrabaıda demalyp qaıttym», - dedi ol. Aıta ketsek, «Kazakh Tourism» ulttyq kompanııasynyń týrızm elshileri qatarynda Sadrıddın Ahmedovtan bólek, elimizdiń maqtanyshy Dımash Qudaıbergen, tanymal ushqyshtar Talǵat Musabaev, Iýrıı Batýrın jáne taǵy basqalar bar.
