Bul basqosýǵa elimizdiń ár aımaǵynan kelgen, onyń ishinde mádenıet basqarmasy ókilderi, oblystyq, qalalyq, aýdandyq, aýyldyq mýzeı mekemeleriniń basshylary, mýzeı salasynyń saqtaýshylary, restavratorlary, ózge de mamandary bar, basy-aıaǵy 150-ge jýyq adam qatysty.
Sessııany Elbasy kitaphanasy dırektorynyń orynbasary Kúláısha Aqtaeva ashty:
– «Uly dalanyń jeti qyry» atty Memleket basshysynyń baǵdarlamalyq maqalasynda belgilengendeı, tarıhı artefaktilerdi zertteý men nasıhattaýdyń ádisteri mýzeı mekemeleriniń dástúrli, ınnovasııalyq, klassıkalyq, zamanaýı maqsattaryna negizdeledi. Táýelsizdik dáýiriniń biregeı tarıhı murasy, Memleket basshysynyń jeke qory shoǵyrlanǵan mekeme retinde Elbasy kitaphanasy «N.Nazarbaev: dáýir, tulǵa, qoǵam» kóshpeli kórme jobasy aıasynda Qazaqstannyń bir qatar óńirinde mýzeı, arhıv, kitaphana salalarynyń mamandaryna arnalǵan kásibı sessııa ótkizýdi jalǵastyrýda. Sandyq júıege kóshý dáýirinde mýzeı jınaqtarynyń aqparattyq áleýetin baǵalamaý múmkin emes. Mýzeıler zamanaýı tehnologııalar men baǵdarlamalardy qoldana otyryp, ózindik mádenı aqparattyq keńistik qalyptastyrady. Mýzeı salasynda aqparattyq tehnologııalardy engizý úrdisi jádigermen jumys jasaý ádisterin ózgertip qana qoımaı, mýzeı jınaǵyn zertteý men nasıhattaý sapasyna da áser etedi.
Qatysýshylardy sessııanyń ýaqyt tártibi men formatymen tanystyrǵan Kúláısha Qabdýalıqyzy «Qazaqstan jáne basqa elderdiń zamanaýı mýzeılerdiń álemdik mádenı keńistiktegi ózara árekettestik tájirıbesi men birigýi» taqyrybynda baıandama jasady. Sonymen qatar, Elbasy kitaphanasynyń Mýzeı qundylyqtaryn esepke alý jáne saqtaý qyzmetiniń qyzmetkerleri ózderiniń baıandamalarynda elektrondyq derekqordy qalyptastyrý, ǵylymı-qor jumystarynda aqparattyq resýrstardy qoldaný, mýzeı jınaqtaryn júıeleý men jikteý jáne qalpyna keltirý jumystaryn júrgizý máseleleri boıynsha ózekti máselelerge toqtaldy.
«Open Space» úlgisinde ótken is-sharada qatysýshylar mýzeı salasynyń ınnovasııalyq tehnologııalary men qor izdenisinde qoldanylatyn aqparattyq resýrstarmen tanysyp, kásibı mamandar ózara pikir almasty.
– Byltyr Elbasy kitaphanasynyń «Nazarbaev: dáýir, tulǵa, qoǵam» atty kóshpeli kórmesi bizdiń Atyraý oblystyq Sh.Sarıev atyndaǵy kórkemsýret jáne qoldanbaly-sándik óner mýzeıinde ótti. Sodan beri eki mekeme arasynda berik baılanys ornaǵan. Qandaı sharaǵa kelsek te jumysymyzǵa paıdaly aqyl-keńester, mańyzdy maǵlumat alýǵa umtylamyz. Búgingi «Qazaqstan mýzeıi: jahandaný jáne aqparattandyrý dáýirindegi ıdeıalar men shyndyqtar» respýblıkalyq kásibı sessııasynan da biraz qundy málimetter aldyq. Atyraý shalǵaı jatqan ólke bolǵandyqtan, sandyq júıege kóshý, sandyq júıeni jumysymyzǵa engizý bul – eń ózekti másele. Endi bul jańashyldyqty óz óńirimizde de júzege asyratyn bolamyz,-dep oı bólisti Atyraý oblystyq Sh.Sarıev atyndaǵy kórkemsýret jáne qoldanbaly-sándik óner mýzeıiniń basshysy Tólegen Orynbasaruly.
Almaty oblysy, Qarasaı aýdany, Shamalǵan aýylyndaǵy «Atameken» tarıhı-mádenı ortalyǵynan kelgen bas qor saqtaýshy Bulbul Nurbekova Elbasynyń barlyq bastamalary men ıdeıasyn qoldaıtynyn aıtty:
«Bizdiń ortalyq Elbasy kitaphanasymen bir baǵytta tyǵyz jumys istep jatyr. Memleket basshysynyń jańa tehnologııaǵa degen negizgi ıdeıasyn qoldaı otyra, qazirgi mýzeılerge óte qajetti sandyq júıeni iske asyra bastadyq. Búgingi sessııadan alǵan mýzeı baǵytyndaǵy jańashyldyqtar jumysymyzdy odan ári jandandyra túsedi dep oılaımyn. Mýzeı salasynda óskeleń urpaqqa jańa baǵyttaǵy sandyq júıe óte qajetti. Ásirese, qor saqtaý qyzmeti boıynsha taptyrmas dúnıe. Jańa tehnologııany paıdalana otyryp, biz kelýshilerdi jan-jaqty aqparatpen qamtyp, qyzyqtyryp kórsete alamyz».
