Facebook paraqshasynda jarııalanǵan «Sıfrly Qazaqstan» memlekettik baǵdarlamasynyń aqparaty boıynsha ýkraınalyqtardy bárinen buryn «Sergek» beıne-baqylaý ıntellektýaldyq júıesi qyzyqtyrady.
«Bizge Astanadaǵy beıne-baqylaý júıesiniń júzege asýy óte unady. Bul joba bizde osy jyly júzege asyryla bastaıdy dep josparlanýda. Bizge Astananyń tájirıbesi óte mańyzdy, onyń qalaı júzege asqany biz úshin úlgi», – dedi Kyiv Smart City jobasynyń úılestirýshisi Iýrıı Nazarov.
Astanada «Sergek» beıne-baqylaý júıesin engizgennen beri jol-kólik oqıǵasy aıtarlyqtaı azaıdy, al aýladaǵy qylmys eki esege qysqardy. Astananyń kóptegen turǵyndary «Sergek» júıesin tek kamera dep oılaıdy.
Biraq kóshedegi sham baǵandarynda ornatylǵan «Sergek» kamerasynyń standartty modýliniń ózi kommýtasıondy blogy bar, derbes qýattaǵyshty men symsyz baılanysy bar kamera bolyp tabylady. Kamera joǵary sezimtal ózindik radarmen jáne neshe túrli datchıktermen jabdyqtalǵan.
«Sergek» beıne-baqylaý júıesiniń ereksheligi: ońaı qurylady, symsyz, qorshaǵan ortanyń zııandy áserine tózimdi, naqty jaǵdaıda kóliktiń memlekettik nómirlerin anyqtaý múmkindigine ıe.
Odan bólek, beıne-baqylaý modýli joldaǵy nysannyń jaǵdaıyn jáne jyldamdyǵyn anyqtaı alady. Al, modýldiń ekologııalyq datchıkteri naqty jaǵdaıda qorshaǵan ortanyń jaǵdaıyn, SO2 konsentrasııasyn, shý deńgeıi, atmosferalyq qysym, ylǵaldylyq jáne temperatýrany anyqtaıdy. Beınekameradaǵy jáne datchıkterdegi barlyq aqparat symsyz arna arqyly serverlerge jiberiledi, keıinnen ahýaldyq ortalyqta óńdeledi.
