Festıval aıasynndaǵy kórmede kópshilikke beıbitshilik qustarynyń 20-dan astam túri usynyldy. Jıyn bastalar aldynda Aqtóbe qalasy ákiminiń orynbasary K.Aıdarhanova men Aqtóbe qalasy «Almaty» aýdanynyń ákimi A.Álimbaev turǵyndar men qatysýshylardy qustar merekesimen quttyqtady. Festıval barysynda jármeńke men konserttik baǵdarlamadan bólek, 3 nomınasııa boıynsha jarystar ótti.
Kórmege qatysqan qusshylardyń eń úlkeni – 70 jastan asqan Amanbaı Satybaldıev. Ol kógershinniń Aqtóbede joq túrlerin ǵana asyraıdy. «1956 jyldan beri kógershin ustaımyn. О́zgelerge «sen ómirge kelgende men kógershin baǵyp júrgenmin» dep aıtamyn. Jasyn 72-de. Meniń asyraýymdaǵy kógershinder 8 saǵat boıy usha alady. Men sodan kúsh qýat alamyn. Tańǵy 6-da turyp, birneshe saǵat boıy aspanǵa qaraımyn, ushyp júrgen qustyń ádemiligine tamsanamyn. Kógershinniń ırandyq, pákistandyq túri bar ózimde. О́zgelerdiń qoly jetpeıtini de osy», deıdi qarııa.
Sońǵy ret Aqtóbe qalasynda kógershinder festıvali 2011 jyly ótken eken. Barlyq qatysýshylar is-sharanyń joǵary deńgeıde uıymdastyrylǵanyn atap ótti. «Bıylǵy jyldy Elbasy tapsyrmasymen Jastar jyly dep atadyq. Osy is-sharanyń maqsaty da sol, keıingi býyndy tatýlyqqa, birlikke shaqyryp, jaqsylyqqa baýlý bolyp tabylady. Kópshilikke málim, kógershin qusy – beıbitshiliktiń, yntymaqtyń syımvoly. Sondyqtan da bul basqosýǵa ózge memleketterden qonaqtardy shaqyrdyq, olar belsendi atsalysty. Sonymen qatar elimizdiń oblystarynyń aýdandarynan, eldimekenderinen de turǵyndar kóptep qatysty.
Jalpy kógershinniń 360-tan astam túri bolatyn bolsa, mundaǵy kórmege jıyrma shaqty qanatty dosymyzdy kópshilikke tanystyrdyq. Endi osyndaı sharany jyl saıyn uıymdastyryp, dástúrge aınaldyrsaq degen oıdamyz», deıdi «Aqtóbe qusshylary» qorynyń múshesi Nurbek Qýatov.
Jıynǵa О́zbekstannan kelgen delegasııany bastap kelgen Nadırbek Djabarovtyń aıtýynsha, qustarǵa degen adamdardyń qurmetin arttyratyn mundaı basqosýlar jalǵasyn tabý kerek. «Biz Qazaqstannyń ońtústiktegi kórshisi ózbek elinen kelip otyrmyz. Kógershinniń birneshe túrin qonaqtarǵa usyndyq. Aqtóbe oblysynyń basshylyǵyna beıbitshilikti nasıhattaıtyn, yntymaǵymyzdy jarastyratyn osyndaı basqosý uıymdastyrǵanyna rızashylyǵymdy bildirgim keledi» deıdi ol.
