Uıymdastyrýshysy Soltústik Qazaqstan ákimdigi men Qazaqstan tennıs federasııasy bolyp tabylatyn «ITF JuniorsG4» básekesine Reseı, AQSh, О́zbekstan, Tájikstan jáne Qazaqstannan júzden astam jas tennısshiler qatysyp, jeńimpazdar anyqtalatyn bolady.
Týrnırdiń ashylý saltanatynda sóılegen sózinde aımaq basshysynyń orynbasary Madııar Qojahmet sońǵy jyldary óńirde úlken tennıspen shuǵyldanýshylar qatarynyń kóbeıip kele jatqanyn, oǵan byltyr ataqty veloshabandoz, London Olımpıadasynyń chempıony Aleksandr Vınokýrov atyndaǵy ámbebep tennıs ortalyǵynyń paıdalanýǵa berilýi aıtarlyqtaı yqpal etkenin jetkizdi.
Alǵashqy kezeńde irikteý jarysy ótip, odan súrinbegenderi aqtyq saıysqa joldama alady.
Týrnırge Orda invest, Terra Motors, Argymaq, Beeline sekildi belgili fırmalar demeýshilik kórsetip otyr.
Sóz arasynda Bolat О́temuratov basqaratyn Qazaqstan tennıs federasııasy halyqaralyq, aımaqtyq iri jobalardy uıymdastyryp, qoldaý kórsetip kele jatqananyn aıta ketken jón.
О́mir ESQALI,
«Egemen Qazaqstan»
Soltústik Qazaqstan oblysy
