Astana Hub IT-startaptar halyqaralyq tehnoparkiniń resmı tusaýkeseri 2018 jyldyń 6 qarashasynda ótken edi. Ortalyq ókili Shaken Marattyń aıtýynsha onyń barlyq quraldary Qazaqstandaǵy tehnologııalyq startaptardy damytýǵa jáne ınnovasııalyq mádenıetti jetildirýge baǵyttalǵan. Startaptardy damytý boıynsha 2 baǵdarlama bar. Onyń birinshisi - akselerasııalaý, ekinshisi -ınkýbasııalaý dep atalady.
-Negizi bizdiń ashylýymyz 2018 jyldyń 6 qarashasy bolǵanymen, biz jumysty jyl basynda, ıaǵnı, aqpan aıynda bastap kettik. Qazir bizge 1 jyl toldy. Osy ýaqyt ishinde bizde 3 akselerasııalaý baǵdarlamasy ótti. Ol degenimiz ne? Ol startaptardy qoldaý, osynda jaqsy bilim berý, ártúrli dematerıaldy kómek berip, jobalardy damytý, qysqa ýaqytta júzege asyrý. Sol úsh akselerasııalaý boıynsha 47 joba qabyldandy. Al olarǵa jalpy 300 mln teńge ınvestısııa tartyldy- dedi Astana Hub – halyqaralyq IT-startaptar tehnoparkiniń ókili.
Aıta keteıik, Astana Hub-tehnoparki Qazaqstandyq jáne sheteldik kompanııalardyń erkin damýyna jaǵdaı jasaǵan ortalyq bolyp tabylady.
Al, jahandyq mıssııasy – ınnovasııalyq jobalardy damytý ortalyǵyna aınalý, serpindi IT-kompanııalardy shyǵarý, sondaı-aq álemniń túkpir-túkpirinen kóptegen qajetti jas jáne talantty IT-mamandaryn tartatyn ortaǵa aınalý. Al, jańa ıdeıasy bar azamattar ortalyq saıtyna tirkelý arqyly óz jobalaryna tegin baǵdarlamalar arqyly qoldaý tabady. Mysaly, Ásel Pazylbekova«Kompra» qyzmetiniń bıznes sarapshysy bolyp isteıdi. Onyń komandasy ózderine jasalǵan qoldaýdyń arqasynda seriktes kompanııalarǵa qatysty mańyzdy málimetterdi bir sátte jınaqtap beretin jańa júıeni engizdi.
- Negizi kompanııalar seriktesterimen kelisimge kelmes buryn, onyń qyzmetin jan-jaqty tekserý kerek. Al, bul derekter kóptegen organdardyń saıtyna kirý arqyly qolymen jınalady. Biz onyń bárin sanadyq. Jalpy 3 saǵat ýaqyt alady. Sot organdary, ózge qaryzdary, jáne t.b. Biz osynyń bárin nebary 3 mınýtta bir betke shyǵaryp beremiz. Qazir bizben jumys isteıtin 12 kompanııa bar. Astana habqa kelgeni damý boldy. Eń birinshi kelgende bizde 200 qoldanýshy bolsa, qazir 7 myń. Sebebi, derek kózin qaıdan alǵanymyzdy kórsetemiz, mysaly bir kompanııany alsaq, onyń basshysy qylmystyq jaýapkershilikten qashyp júr. Qazaqstannan shyǵýǵa tıym bar ma, joq pa, ony da kórsetemiz. Qazir biz jańa júıe jasap jatyrmyz. Kompanııa qandaı fırmalarmen baılanysta ekenin, kimdermen isteıtinin bile alamyz. Terrorızmdi qarjylandyrýǵa, pedofılderge qatysty málimetter bazasy bar, ondaı azamattarǵa baılanysty málimetterdi bir sátte shyǵaramyz, - deıdi Ásel.
«Kids Security» jobasynyń ókili Baýyrjan Kósherbaev bala qaýipsizdigi úshin mańyzdy qosymshany engizýde. Bul arqyly ata-analar balasyn únemi qadaǵalap, qaıda júrgenin bilip otyrady.
-Biz osynda ótken kýrsta 300 ata -anany zerttedik. Solardyń problemalaryn anyqtadyq. Bizdiń joba negizi bala qaýipsizdigi týraly. Sebebi, keıingi kezde balalar kóp joǵalady. 2010-2017 jyldar aralyǵynda6 myń bala joǵalypty. Biraq, olardyń kóbisi tabyldy, birazi joq. Bizdiń fýnksııamyzdyń maqsaty- balanyń ornalasqan jerin anyqtaý. Bala úıden nemese mektepten shyqqanda anasyna habarlama keledi. Onyń aınalasynda ne bolyp jatqanyn estı alady. Balanyń telefony dybyssyz bolsa da qońaraý shala alady. Oqýshynyń qaı jerde bolǵanyn, júrgen jerlerin karta arqyly kóresiz. Qandaı qosymshalardy kórgenin, qandaı saıttarǵa jáne qansha ýaqyt kórgenin bilýge bolady. Eger, kóp qaraǵan jaǵdaıda balaǵa zııan kelmes úshin qashyqtyqtan saıttarǵa shekteý qoıa alady. Bul kezde balańyz tek qońyraý shala alady. Basqa saıttarǵa kire almaıdy.
Astana Hub ókili Shaken Marattyń aıtýynsha 2018 jyldyń 27 jeltoqsanynda prezıdent qatysýshylarǵa salyqtyq jeńildikter jasaý týraly zańǵa qol qoıdy. Al, bul artyqshylyqtar halyqaralyq ınvestorlar men sarapshylar úshin tartymdy bolmaq. Sonymen qatar, bolashaqta otandyq IT-salanyń eksporttyq áleýeti artady, «Astana Hab» rezıdentteriniń taýarlary men ónimderin álemdik básekege saı bolýyn qamtamasyz etedi.
-Zańnamalardy qabyldap, jarııa etý úshin 1-2 aı ýaqyt kerek. Soǵan sáıkes, bizge tirkelgen kompanııalar ártúrli salyqtyq jeńildikterge ıe bolady. Mysaly, qosymsha qun salyǵy, jer salyǵy, ártúrli jekemenshik salyqtar 0%-ǵa deıin qysqartylady, bir aıta ketetini bul jeńildikter tek Astanalyqtarǵa ǵana emes, ózge qaladaǵy kompanııalarǵa da beriledi, tek olar osynda tirkeýli kerek. Sebebi, bizge qazir basqa da óńirlerden kelip jatyr, shet elderden de kelip jatyr.
«Smart janarmaı beketi» jobasynyń ókili Baýyrjan Tóleý jumys isteıtin komanda júrgizýshi men janarmaı beketteri arasyndaǵy avtomattyq saýdany jolǵa qoıdy.
-Bul jeke júrgizýshisi úshin ne beredi? Eń aldymen kólik ıesi janar maı beketine kelgende smartfon arqyly qyzmet alady. Iаǵnı, kóliginen shyqpaıdy, kezekte turmaıdy, aqysyn telefon arqyly tóleıdi. Onyń ústine beketter usynǵan kóptegen qyzmet túrlerin paıdalana alady, aksııalarǵa qatysa alady, jeńildikpen benzın alady,ondaǵy dúkenderdegi taýarlardyń baǵasyn bile alady, olardy elektrondy júıe boıynsha satyp alady. Ekinshi bir jaǵy, bul korporatıvti qyzmet túrine qatysty. Biz talondyq júıeni elektrondy formatqa kóshiremiz. Kompanııalarǵa alańdaýǵa negiz joq,sebebi júrgizýshiler buǵan deıin talondardy ózge maqsatqa paıdalansa, qazir ony satý, ózgege berý múmkin bolmaıdy. Bári baqylaýda bolady, monıtorıng jasalady. Talon,karta shyǵarýdyń qajeti joq bolady. Eń aldymen urlyq tıylady. Astana, Almaty, Qaraǵandy qalalaryndaǵy janarmaı beketteri jelisinde jumys bastadyq. Jýyrda Reseı kompanııasymen kelisimge keldik, al odan keıin álemniń 51 elinde 71 myń beketibar halyqaralyq kompanııamen kelisimge otyrdyq. Osylaısha Eýropa naryǵyna shyǵamyz degen oıdamyz-deıdi komanda múshesi.
Bolashaqtyń ekonomıkasy sıfrly tehnologııada. Sondyqtan tehnoparkty damytý jalǵasa beredi. Biz joǵaryda sanaýly ǵanajobalarǵa toqtaldyq. Al olarmen birge taǵy ondaǵan startap óz jumysyn bastaýda jáne jýyrda kezekti akselerasııalaý bastalady. «Astana hab» ókilderiniń málimetinshe 2022 jylǵa deıin osyndaı jobalarǵa 67 mlrd teńge venchýrlyq ınvestısııa tartý kózdelip otyr.
