«Aqparat jáne kommýnıkasııalar mınıstrligi 3 jyldaı ýaqyt jumys atqardy. Men úshin - basqarýshylyq jumystaǵy teńdessiz tájirıbe boldy. Osy ýaqyttyń ishinde kóptegen jumystar atqaryldy. «Sıfrly Qazaqstan» baǵdarlamasy bastaldy, «Astana Hab» tehnoparkiniń irgesi qalandy. Aımaqtardyń birazynda sıfrly televızııa kórsetile bastady. Aýyldy jerlerde 20 myń shaqyrymdyq optıkalyq-talshyqty jeliniń qurylysy bastaldy. Memlekettik qyzmet kórsetý prosesteri ońtaılandyryldy. Maǵan senim bildirgen Prezıdentke alǵysymdy aıtamyn», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.
Mınıstr ótken shaqty eske ala kele endigi kezekte qandaı baǵytta jumys júrgizetinin aıtyp ótti.
«Qazirgi ýaqytta biz uıymdastyrýshylyq máselelerin sheshýge tyrysyp jatyrmyz. Eń aldymen, jańa qurylymnyń ákimshilik, quqyqtyq, qarjylaı jumysyn rettep, biryńǵaı jumys josparyn ázirleý kerek. Sonymen birge, shaıqalyp júrýge ýaqyttyń joqtyǵyn bilip otyrmyz. Kúni erteń bizdiń mınıstrliktiń alqa otyrysy ótkizilip, sonyń barysynda osy jylǵy jumystyń basty basymdyqtary aıqyndalatyn bolady. Darhan Amanuly Káletaev úlken jumys atqardy. Basshylyqtyń aýysýy degen - bir saǵatta bárin ózgertip, qysqartyp, qaıta jasaý kerek degendi bildirmeıdi. Joq! Biz bastalǵan isti jalǵastyryp, jumys baǵytyn jańa ıdeıalarmen, bastamalarmen jáne jobalarmen tolyqtyra túsemiz», - deıdi Dáýren Abaev.
