«Rýhanı jańǵyrý» baǵdarlamasy aıasynda uıymdastyrylatyn saıys Almaty qalasyndaǵy joǵary oqý oryndarynyń stýdentteri arasynda júrgizilmek.
Jandar Asannyń aıtýynsha, ıntellektýaldy olımpıada 5 aınalymnan turady.
Alǵashqy kezeńde ár komanda óziniń ýnıversıteti men múshelerin tanystyryp, komandanyń atyn qorǵaıdy.
«Tarıhı hronologııa» atty ekinshi aınalymda ár komanda uıashyqtardyń artynda jasyrylǵan tarıhı datalardyń maǵynasyn durys ashýy tıis. Bul sandar Uly dalanyń uly qyzdarynyń ómiri men qoǵamdyq-saıası qyzmetimen baılanysty. Komandalar durys jaýap bergenine qaraı upaı enshileıdi.
Úshinshi týrda qatysýshylarǵa «Uly dalanyń qaharman qyzdary» taqyrybyndaǵy arnaıy beınetaspaǵa túsirilgen saýaldar qoıylady.
«Tarıhı termınologııa» atty tórtinshi aınalymnyń sharty boıynsha ár komanda tarıhı termınderge 3 deńgeı negizinde anyqtama berýi tıis. 1-deńgeı «qola qaqpa», 2-deńgeı «kúmis qaqpa» jáne 3-deńgeı «altyn qaqpa» dep atalady. Tolyq jaýap bergen komanda ǵana úsh qaqpany ashqan bolyp, tolyq baǵalanady. Úshinshi qaqpanyń suraǵy aǵylshyn tilinde qoıylady, sáıkesinshe komandalar suraqtarǵa aǵylshyn tilinde jaýap beredi.
Sońǵy kezeń «Oı tolǵaý» dep atalady. Bul aınalymda el tarıhyndaǵy esimderi ulyqtalǵan uly qyzdar týraly esse suraqtar jerebe negizinde ár komanda jetekshisine úlestiriledi. Shart boıynsha saıysker tapsyrmany oryndaýǵa beriletin 10 mınýtta 100 sózden kem emes esse jazýy tıis. Esseniń jazý barysynda qatysýshynyń jeke kózqarasynyń kórinisi, faktiler, teorııalyq negizdemesi, termınderdi qoldanýy, logıkalyq zańdylyqtardyń saqtalýy, salystyrý jáne baǵalaý, qorytyndylaý ádisterin qoldanýy basty nazarǵa alynady.
Zııatkerlik olımpıada qazaq tilinde júrgiziledi. Komandanyń quramy «Tarıh» mamandyǵynda oqymaıtyn 3 stýdentten jasaqtalýy shart.
