– О́tken jylǵy esep boıynsha Aqmola oblysynda 15 myń jumysshy 25 aılyq eseptik kórsetkishten tómen, ıaǵnı 63125 teńgeden az eńbekaqy alatyny anyqtalǵan. Jalaqysy tómen jumysshylardyń salyq júktemesin azaıtýdyń nátıjesinde únemdelgen 230,9 mıllıon teńge eńbekaqyny arttyrýǵa baǵyttalatyn bolady,-deıdi oblystyq memlekettik kirister departamentiniń jetekshisi Taýken Oshaqbaev.
Jıyn barysynda óńirdi gazdandyrýǵa qatysty birqatar máseleler talqylandy. Qazirgi tańda «Saryarqa» magıstraldy gaz qubyrynyń qurylysynyń jobasy júzege asýda. Gaz qubyry Qaraǵandy, Soltústik Qazaqstan, Aqmola oblystaryna tartylmaq. Oblysta 120 shaqyrym gaz qubyry salynbaq.
– О́ńirdi gazdandyrý máselesine keler bolsaq, Arshaly jáne Selınograd aýdandaryndaǵy barlyǵy 92 myń turǵyny bar 20 eldimekendi gazdandyrý josparlanyp otyr. Bolashaqta barlyǵy 160 myń turǵyndy qamtıtyn taǵy 24 eldimekendi gazdandyrý qolǵa alynbaq,-deıdi oblystyq energetıka jáne turǵyn úı-kommýnaldyq sharýashylyǵy basqarmasynyń jetekshisi Ivan Iýrchenko.
Magıstraldy gaz qubyrynyń qurylysyn aıaqtaý aǵymdaǵy jyldyń sońyna deıin josparlanyp otyr. Trassany daıyndaý jumystary 27 aqpannan bastalyp ketti. Dánekerleý jumystaryn júrgizý naýryzdyń sońyna josparlanyp otyr. Búgingi tańda oblys ákimdigi tarapynan magıstraldy gaz qubyrlaryna gaz taratqysh jelilerin ornatý boıynsha jol kartasy ázirlengen.
Baıqal BAIÁDIL,
«Egemen Qazaqstan»
